গুৱাহাটীঃ কৰ’না কালৰ মাজতে ৰাষ্ট্ৰীয় স্বাস্থ্য অভিযানৰ ২২ সহস্ৰাধিক ঠিকাভিত্তিক কৰ্মচাৰীৰ বাবে সু-খবৰ। বাকী কৰ্মচাৰীসকলৰ দৰে এইসকল কৰ্মচাৰীৰ চাকৰিও সুৰক্ষিত হ’ব ৬০ বছৰলৈ।

এই সন্দৰ্ভত ইতিমধ্যে প্ৰাৰম্ভিক প্ৰক্ৰিয়া আৰম্ভ হৈছে। কৰ’নাৰ বিৰুদ্ধে যুঁজত মুখ্য ভূমিকা পালন কৰা ৰাষ্ট্ৰীয় স্বাস্থ্য অভিযানৰ কৰ্মচাৰীসকলৰ মনত থকা অনিশ্চয়তা দূৰ কৰিবলৈকে এই সিদ্ধান্ত গ্ৰহণ কৰে ৰাজ্য চৰকাৰে।

যোৱা ২৭ আগষ্টত অসম চৰকাৰৰ স্বাস্থ্য আৰু পৰিয়াল কল্যাণ বিভাগৰ উপ-সচিব সৌৰভ সেনাপতিয়ে এন এইচ এমৰ মিছন সঞ্চালকাললৈ বিষয়টো সন্দৰ্ভত পত্ৰ প্ৰেৰণ কৰি ঠিকাভিত্তিক কৰ্মচাৰীসকলৰ চাকৰিৰ ম্যাদ বৃদ্ধি, ই এল, চি এল, মাতৃত্বকালীন ছুটী, গ্ৰেচুইটি আদিৰ সুবিধা প্ৰদানৰ প্ৰস্তাৱ প্ৰেৰণ কৰিছিল।

জানিব পৰা মতে, মিছন সঞ্চালকৰ কাৰ্যালয়ত যোৱা ৪ ছেপ্তেম্বৰত ৰাষ্ট্ৰীয় স্বাস্থ্য অভিযান অসমৰ কৰ্মচাৰী সন্থাৰ বিষয়ববীয়াসকলে সঞ্চালকৰ সৈতে এই দাবীসমূহ পূৰণৰ বাবে এখন আলোচনাতো মিলিত হৈছিল। উক্ত আলোচনাকালত বিভাগৰ উপ-সচিবে প্ৰেৰণ কৰা প্ৰস্তাৱৰ সন্দৰ্ভত বিশদ ভাবে আলোচনা কৰা হয়।