নতুন দিল্লীঃ ‘প্ৰাণায়ামৰ জৰিয়তে শৰীৰৰ প্ৰতিৰোধ ক্ষমতা আমি বৃদ্ধি কৰিব পাৰো।’-দেশত কৰ’নাক্ৰান্তৰ সংখ্যাই ৪ লাখৰ ঘৰ স্পৰ্শ কৰাৰ সময়তে বিশ্ব যোগ দিৱস উপলক্ষে আজি এই মন্তব্য কৰে প্ৰধানমন্ত্ৰী নৰেন্দ্ৰ মোদীয়ে। কৰ’না কালত প্ৰধানমন্ত্ৰীগৰাকীয়ে ইয়াক ডেইলী ৰুটিনৰ অন্তৰ্ভুক্ত কৰিবলৈকো বিশ্ববাসীক আহ্বান জনায়।

‘যোগাভ্যাসৰ জৰিয়তে বিশ্বৰ বহুসংখ্যক কৰ’না ৰোগীয়ে উপকৃত হৈছে। যোগাভ্যাসে কঠিন সময়তো আমাক শক্তিশালী হৈ থাকিবলৈ সাহস দিয়ে। যোগাভ্যাসে আমাৰ শৰীৰ আৰু মনকো শক্তিশালী কৰি তোলে।’-আন্তৰ্জাতিক যোগ দিৱসক লৈ এইদৰে কয় মোদীয়ে।

উল্লেখ্য যে, ২০১৫ চনৰ ২১ জুনত প্ৰথমবাৰৰ বাবে আন্তৰ্জাতিক যোগ দিৱসৰ আয়োজন কৰা হৈছিল। এইবাৰ মহামাৰী কৰ’না তথা সূৰ্যগ্ৰহণৰ পৰিপ্ৰেক্ষিতত সমূহীয়া যোগ দিৱস আয়োজনৰ পৰিৱৰ্তে ডিজিটেলি আয়োজন কৰা দেখা গৈছে। মহামাৰী কৰ’নালৈ চাই এইবাৰৰ যোগ দিৱসৰ থিমো হৈছে, ‘ঘৰতে পৰিয়ালৰ সৈতে যোগাভ্যাস’।

এই থিম অনুযায়ী চলিত বৰ্ষৰ যোগ দিৱসত সকলোৱে ঘৰতে যোগ কৰা দেখা গৈছে। যোগৰ অন্তত উক্ত ভিডিঅ’ ভিন্নজনে ছ’চিয়েল মিডিয়াত আপলোড কৰিছে। অসমতো মুখ্যমন্ত্ৰী সৰ্বানন্দ সোণোৱালৰ পৰা আৰম্ভ কৰি সৰ্বসাধাৰণলৈকে অধিকাংশ লোকেই আজি পুৱাৰ ভাগত ঘৰতে ডিজিটেলি এই যোগ দিৱসত ভাগ লয়