বোকাজানঃ কাৰ্বি আংলঙৰ বাবে আহিল আন এক দুঃখবৰ। ক’ভিড-১৯ ত আক্ৰান্তহৈ আজি গুৱাহাটী জিএমচিএইছত শেষ নিশ্বাস ত্যাগ কৰে কাৰ্বি আংলং স্বায়ত্ব শাসিত পৰিষদৰ কৃষি বিভাগৰ ভাৰপ্ৰাপ্ত অতিৰিক্ত সঞ্চালক ৰামছিং হাঞ্চেই ৷

স্বায়ত্ব শাসিত পৰিষদৰ স্বাস্থ্য বিভাগৰ কাৰ্যবাহী সদস্য খনছিং ৰংপি কৰ’নাত আক্ৰান্ত হোৱাৰ পিছতে জিলাখনত কৃষি বিভাগৰ অভিযন্তা তথা বিভাগটোৰ অতিৰিক্ত সঞ্চালক ৰামছিং হাঞ্চে কৰ’নাত আক্ৰান্ত হোৱাৰ কথা পোহৰলৈ আহিছিল ৷

উল্লেখ্য যে, যোৱা কিছুদিন ধৰি জ্বৰ, চৰ্দি, কাঁহ এচিডিটি আদিত আক্ৰান্ত হৈ থকা কৃষি বিভাগৰ জ্যেষ্ঠ বিষয়া গৰাকীয়ে ডিফু চিকিৎসা মহাবিদ্যালয় আৰু চিকিৎসালয়ত চিকিৎসা গ্ৰহণ কৰি আছিল ৷ ইয়াৰ মাজতে যোৱা ৪ জুলাইত বিষয়াগৰাকী গুৰুতৰ বাবে অসুস্থ হৈ পৰে ৷ ৫ জুলাইত বিষয়া গৰাকীৰ স্বাৱ টেষ্টৰ ৰিজাল্ট পজিটিভ আহে ৷

বিষয়াগৰাকীৰ স্বাস্থ্যৰ অৱস্থা অনুকুল নোহোৱাত তেওঁক উন্নত চিকিৎসাৰ বাবে গুৱাহাটীলৈ প্ৰেৰণ কৰা হয় ৷ বিষয়াগৰাকী গুৱাহাটী চিকিৎসা মহাবিদ্যালয়ত ভৰ্তি কৰোৱা পিছত শ্বাস-প্ৰশ্বাসত ভুগি আজি পুৱা ১০ বজাত কৰুণ মৃত্যুক আকোঁৱালি লয় ৷

আনহাতে আজি পুৱাৰ ভাগত প্ৰাপ্ত তথ্য অনুসৰি জিলাখনৰ ১৬ বছৰৰ অনুৰ্ধৰ ৫ জনকৈ শিশু আৰু এজন ৫৬ বছৰীয়া লোকো কৰ’নাত আক্ৰান্ত হোৱাৰ বাতৰি আহিছে ৷ মুঠতে কাৰ্বি আংলং জিলাখন কৰ’নাৰ গণ সংক্ৰমনৰ হটস্পটলৈ পৰ্যবসিত হব ধৰিছে।