কোকৰাঝাৰঃ বিটিএডিত সংঘটিত ব্যাপক দুৰ্নীতি, স্বজন-তোষণৰ বিৰুদ্ধে কঠোৰ স্থিতি গ্ৰহণ কৰি অৱশেষত ভিচিডিচি, টিচিএলচিচি, কেন্দ্ৰীয় নিযুক্তি বৰ্ড ভংগ কৰে ৰাজ্যপালে৷ সোমবাৰে বিটিচিৰ সদৰ কোকৰাঝাৰত উপস্থিত হোৱা ৰাজ্যপালে এই কথা ঘোষণা কৰে৷ ৰাজ্যপাল জগদীশ মুখীয়ে এই কথা ঘোষণা কৰাৰ উপৰিও এসপ্তাহৰ ভিতৰতে ভিচিডিচিসমুহৰ পৰা জব কাৰ্ডসমুহ হিতাধিকাৰীৰ হাতলৈ হস্তান্তৰ কৰিবলৈ কঠিৰ নিৰ্দেশ প্ৰদান কৰিছে।

বিটিএডিৰ শাসন কাৰ্য চলাই থকা ৰাজ্যপাল জগদীশ মুখীয়ে দুৰ্নীতিৰ বিৰুদ্ধে কঠোৰ স্থিতি গ্ৰহণ কৰি ভিচিডিচি, টিচিএলচিচি, চিএচবিসমূহ ভংগৰ ঘোষণা কৰি বিটিএডিৰ চাৰিখনকৈ পৌৰসভাও ভংগ কৰি দিয়া ঘটনাই বিটিএডিত আলোড়নৰ সৃষ্টি কৰিছে। এদিনীয়া ভ্ৰমণসূচীৰে সোমবাৰে কোকৰাঝাৰত উপস্থিত হোৱা ৰাজ্যপাল জগদীশ মুখীয়ে বিভিন্ন কাৰ্যসূচীৰ অন্তত বিটিচি সচিবালয়ৰ প্ৰেক্ষাগৃহত অনুষ্ঠিত কৰা সংবাদমেলত কয় যে বিটিচি পৰিষদীয় অঞ্চলটোত যথেষ্ট দুৰ্নীতি সংঘটিত হোৱা বুলি বিভিন্ন পক্ষৰ পৰা অভিযোগ পোৱা গৈছে৷

বিটিএডিত জব কাৰ্ডক লৈ ব্যাপক হাৰত দুৰ্নীতি সংঘটিত হৈছে বুলি মন্তব্যৰে ৰাজ্যপালে কয় যে জব কাৰ্ডসমূহ হিতাধিকাৰীৰ সলনি ভিচিডিচিৰ অধ্যক্ষ বা সদস্যৰ ঘৰত হে উপলব্ধ হৈ অহাৰ পৰিণতিতে হিতাধিকাৰীসকলে বহু সময়ত তেওঁলোক কামৰ বিনিময়ত লাভ কৰা প্ৰাপ্য মজুৰিৰ ক্ষেত্ৰতো অৱগত নহয়। প্ৰকৃত হিতাধিকাৰীয়ে চৰকাৰী আঁচনিৰ ধন নিজৰ জব কাৰ্ডৰ একাউন্টত সোমায় নে নোসোমায় সেই বিষয়েও জ্ঞাত নহয় বুলি মন্তব্য কৰি ৰাজ্যপালে জব কাৰ্ডক লৈ সংঘটিত হোৱা দুৰ্নীতি আৰু কেলেংকাৰীৰ বিষয়টো এসপ্তাহৰ ভিতৰত তদন্ত কৰিবলৈ নিৰ্দেশ প্ৰদান কৰিছে।

এতিয়াৰে পৰা জব কাৰ্ডৰ মাধ্যমত ৰূপায়িত হোৱা চৰকাৰী আঁচনিৰ কাম কাজসমূহ খণ্ড উন্নয়ন বিষয়াৰ তদাৰকত সম্পন্ন হব বুলি মন্তব্য কৰি ৰাজ্যপালে কেন্দ্ৰীয় নিযুক্তি বৰ্ড আৰু বিটিএডিৰ ৯খন পৌৰসভাৰ ভিতৰত ৪খন ভংগ কৰাৰ লগতে আন মনোনীত সদস্যসকলৰ কাৰ্যক্ষমতাও ভংগ কৰি দিয়া হৈছে সংবাদমেলত উল্লেখ কৰিছে ৰাজ্যপালে৷