কোকৰাঝাৰঃ অগপ নেতা তথা ৰাজ্যৰ প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই বুধবাৰে কোকৰাঝাৰত উপস্থিত হৈ দলীয় কৰ্মকৰ্তাৰ সতে বৈঠকত মিলিত হয়। গোৱালপাৰা, ধুবুৰী জিলা পৰিভ্ৰমণৰ অন্তত কোকৰাঝাৰত উপস্থিত হৈ প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই সংবাদমাধ্যমৰ আগত অখিল গগৈক আৱদ্ধ কৰি ৰাখিলেই ন্যায্য দাবীসমূহ নাইকীয়া হৈ নাযায় বুলি তাৎপৰ্যপূৰ্ণ মন্তব্য প্ৰকাশ কৰিছে। কাৰ বিৰোধিতা কৰি চৰকাৰে বাংলাদেশৰ পৰা মানুহ আনিব বিচৰা কাৰ্যৰো বিৰোধিতা কৰিছে প্ৰফুল্ল মহন্তই।

তদুপৰি বানপানীৰ ফলত খেতিপথাৰ বিনষ্ট হোৱা আৰু ক’ৰোনা ভাইৰাছক লৈ বিপদৰ সন্মুখীন হোৱা জনসাধাৰণৰ সমস্যা সমাধানৰ বাবে চৰকাৰে লোৱা উদ্যোগ পৰ্যাপ্ত নহয় বুলি অভিযোগ উত্থাপন কৰি জনসাধাৰণৰ সমস্যা সমাধানৰ্থে চৰকাৰক যথোপযুক্ত পদক্ষেপ লবলৈ আহ্বান জনাইছে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই। ইপিনে সংক্ৰমিত ভাইৰাছ ক’ৰোনাৰ পৰা পৰিত্ৰাণ পাবলৈ পৰিস্কাৰ-পৰিচ্ছন্নতা আৰু সামাজিক দূৰত্ব পালন কৰিবলৈ সকলোৰে প্ৰতি আহ্বান জনাইছে প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই।