কোকৰাঝাৰঃ ৰাজ্যজুৰি কৰোনাতংকৰ মাজতে কোকৰাঝাৰত এগৰাকী আৰক্ষী জোৱান কৰোনাত আক্ৰান্ত হোৱাত জিলা আৰক্ষী প্ৰশাসনৰ মাজত চাঞ্চল্যৰ সৃষ্টি হৈছে। কোকৰাঝাৰ সপ্তম অসম বেটেলিয়নৰ জোৱান লোহিত ৰায় সম্প্ৰতি কৰোনাত আক্ৰান্ত হোৱাত চৰাইখোলাস্থিত সপ্তম অসম আৰক্ষীৰ হেডকোৱাৰ্টাৰ কণ্টেইণ্টমেণ্ট জন হব নেকি বুলিও প্ৰশ্ন উত্থাপিত হৈছে।

কোকৰাঝাৰত পুনৰ ৪৭ জন লোক কৰোনাত আক্ৰান্তৰ ভিতৰত লোহিত ৰায়ৰ ট্ৰেভেল হিষ্টৰীয়ে সম্প্ৰতি প্ৰশাসনক বিপাঙত পেলাইছে। এগৰাকী উপ আৰক্ষী অধীক্ষকৰ দেহৰক্ষী হিচাপে নিয়োজিত হৈ থকা লোহিত ৰায় যোৱা ৪ জুনৰ পৰা অসম-বংগ সীমান্তৰ শ্ৰীৰামপুৰ গেটত কৰ্মৰত আছিল। লোহিত ৰায়ৰ স্বাৱ সংগ্ৰহ কৰাৰ পিছত যোৱা ২০ জুন তাৰিখে নমুনাা বৰপেটাৰ ফকৰুদ্দিন আলি আহমেদ কলেজ ও হস্পিতাললৈ প্ৰেৰণ কৰাৰ পিছত মঙলবাৰে নিশা লোহিত ৰায়ৰ নমুনা পজিটিভ বুলি ৰিপৰ্ট আহে।

শ্ৰীৰামপুৰতে নিজ কৰ্তব্য সমাপন কৰি থকা লোহিত ৰায়ে মঙলবাৰেও সপ্তম অসম আৰক্ষী বেটেলিয়নলৈ আহিছিল। বহুতৰ সংস্পৰ্শলৈ অহা লোহিত ৰায়ে যোৱাকালিও অৰ্থাৎ মঙ্গলবাৰেও সপ্তম অসম আৰক্ষী বেটেলিয়নলৈ অহাত এতিয়া হেডকোৱাৰ্টাৰত আতংকই বিৰাজ কৰিছে। কৰোনা যোদ্ধা এতিয়া কৰোনা সংক্ৰামক হব নেকি বুলিও প্ৰশ্ন উত্থাপিত হৈছে। অৱশ্যে ইতিমধ্যে লোহিত ৰায়ক শ্ৰীৰামপুৰৰ পৰা কোকৰাঝাৰ অসমাৰিক চিকিৎসালয় লৈ এম্বুলেন্সযোগে স্থানান্তৰ কৰা হৈছে।

কৰোনা সংক্ৰমণৰ পৰিস্থিতি সন্দৰ্ভত কোকৰাঝাৰ জিলাৰ উপায়ুক্ত ভাস্কৰ ফুকনে বৰ্তমানলৈকে কোকৰাাঝাৰত কৰোনা ৰোগীৰ সংখ্যা ১২৮ গৰাকী বুলি উল্লেখ কৰে। চৰকাৰী নীতি নিৰ্দেশনা পালন কৰিবলৈ সকলোৰে প্ৰতি আহ্বান জনাই কোকৰাঝাৰ জিলা উপায়ুক্ত ভাস্কৰ ফুকনে চিকিৎসালয়ৰ পৰা কেবাগৰাকী ৰোগী সুস্থ হৈ নিজ নিজ ঘৰলৈ উভতি গৈছে বুলিও সদৰী কৰে।