গুৱাহাটীঃ ৰাজ্যৰ ৰাজধানী গুৱাহাটী মহানগৰীত সম্পূৰ্ণ লক-ডাউন পালন কৰি জনসাধাৰণ ঘৰত আৱদ্ধ হৈ পৰাৰ সময়তে গুৱাহাটী আৰক্ষীয়ে দিনে-নিশাই কৰ্তব্য পালন কৰিছে৷ ৰদে-বৰষুণে ৰাজপথত থিয় দি থাকি ৰাজপথত ওলাই অহা গাড়ীসমূহ তালাচী চলোৱাৰ লগতে লক-ডাউন সফল কৰিবলৈ ব্যস্ত গুৱাহাটী আৰক্ষী৷ গুৱাহাটী আৰক্ষীয়ে আৰ্তজনক সহায়-সহযোগ কৰিবলৈ আগবাঢ়ি আহিছে৷

এই সকল গুৱাহাটী মহানগৰীৰ আৰক্ষীক উৎসাহিত কৰিবলৈ বুধবাৰে মুখ্যমন্ত্ৰী সৰ্বানন্দ সোণোৱালে ৰাজপথলৈ ওলাই আহে৷ গুৱাহাটীৰ ৰাজপথত সোণোৱালে আৰক্ষীসকলে নিষ্ঠাসহকাৰে দায়িত্ব পালন কৰাৰ বাবে আন্তৰিক ধন্যবাদ যাচে৷ বুধবাৰে গধূলি গুৱাহাটীৰ জু-ৰোডত কৰ্তব্যৰত আৰক্ষীসকলক ধন্যবাদ যাচি মত বিনিময় কৰে মুখ্যমন্ত্ৰী সোণোৱালে৷ সোণোৱালে কয় ‘‘আৰক্ষীসকল সমাজৰ দায়িত্বশীল প্ৰহৰী। বৰ্তমান কোৱিড-১৯ বিৰোধী যুঁজৰ প্ৰত্যাহ্বানৰ মাজতো অসম আৰক্ষীয়ে সদাসষ্টম হৈ ৰাইজৰ সুৰক্ষাৰ বাবে অগ্ৰণী ভূমিকা পালন কৰি আছে।’’

আনহাতে কোৱিড-১৯ৰ মহামাৰীৰ সৈতে যুঁজ দিয়া অন্যতম যোদ্ধা চিকিৎসসকলৰ সৈতেও মত বিনিময় কৰে সোণোৱালে৷ চিকিৎসক দিৱস উপলক্ষে চিকিৎসকসকলৰ সৈতে মত-বিনিময় কৰি সোণোৱালে কয় ‘‘চিকিৎসকসকল হৈছে জীৱনদায়িনী দূতসদৃশ আৰু মহামাৰী কোৱিড-১৯ বিৰোধী যুঁজত তেখেতসকল আমাৰ মূল শক্তি। এই ‘চিকিৎসক দিৱস’ত আহক আমি সকলোৱে তেখেতসকলৰ কাষত থিয় হৈ উৎসাহিত কৰোঁ আৰু সমাজৰ প্ৰতি আগবঢ়াই অহা অমূল্য সেৱাৰ বাবে কৃতজ্ঞতা জনাওঁ।’’