বেবেজীয়াঃ নগাঁও জিলাৰ কুৰুৱাবাহী-গেদাৰবড়ি-ব্ৰাহ্মণগাঁও চাৰিআলি গড়কাপ্তানী পথৰ কদৰ্য ৰূপে যমৰ-যাতনা ভোগাইছে বটদ্ৰৱা বিধানসভা সমষ্টিৰ পূৱ-হাতীচোং অঞ্চলৰ লোকক৷ নগাঁও জিলাৰ নগাঁও গ্ৰাম্য পথ সংমণ্ডলৰ তথা বটদ্ৰৱা উপ-সংমণ্ডলৰ অন্তৰ্গত কুৰুৱাবাহী-গেদাৰবড়ি-ব্ৰাহ্মণগাঁও চাৰিআলি গড়কাপ্তানী পথত এতিয়া গাড়ী-মটৰ দূৰৰ কথা সাধাৰণ লোকৰ বাবে খোজকঢ়াৰ পৰিবেশ নোহোৱা হৈছে৷

বিধ্বস্ত পথটোৱে গঞাক জ্বলা-কলা খুৱাই অহাৰ পিছতো বটদ্ৰৱা বিধানসভা সমষ্টিৰ বিধায়িকাই আজিলৈ পথটো মেৰামতি কৰাত গুৰুত্ব প্ৰদান নকৰাৰ অভিযোগ উত্থাপন হৈছে৷ পূৱ-হাতীচোং অঞ্চলৰ কেইবাখনো গাঁৱৰ ৰাইজে বেবেজীয়া, নগাঁও চহৰকে প্ৰমুখ্য কৰি বিভিন্ন ঠাইলৈ যাতায়াত কৰাৰ একমাত্ৰ ভৰষা এই পথটোৰ অৱস্থা এতিয়া শোচনীয়।

পকী পথটোৰ ঠাই বিশেষে অসংখ্য গাতৰ সৃষ্টি হোৱাত বহুকেইটা দুৰ্ঘটনা সংঘটিত হৈছে। প্ৰায় ৫ বছৰৰ পূৰ্বে প্ৰধানমন্ত্ৰী গ্ৰাম চড়ক যোজনাৰ অধীনত পকীকৰণ কৰা পথটো দীৰ্ঘদিন ধৰি মেৰামতি নকৰাৰ ফলত গাতৰ সৃষ্টি হোৱাত এজাক বৰষুণতে বৰষুণৰ পানী জমা হোৱাৰ ফলত পথটোৰে যাতায়ত কৰাৰ পৰিবেশ নাথাকে৷ পথচাৰীসকলে যাতায়াতত যমৰ যাতনা ভোগ কৰি আহিছে৷ পথটো শীঘ্ৰে মেৰামতি কৰিবলৈ দাবী জনাইছে ৰাইজে৷