গুৱাহাটীঃ ৰাজ্যত ৰাজ্য চৰকাৰৰ নতুন ভূমি নীতিৰ কেবিনেট সিদ্ধান্তৰ বিৰুদ্ধে প্ৰতিবাদ অব্যাহত থকাৰ সময়তে বাও দল চিপিআইএমৰ অসম ৰাজ্যিক সমিতিয়ে এক বিবৃতি যোগে তীব্ৰ সমালোচনা কৰিছে ৰাজ্য চৰকাৰক৷ চিপিআইএমৰ অসম ৰাজ্যিক সমিতিৰ সম্পাদক দেবেন ভট্টাচাৰ্যই বিবৃতি যোগে এই ভূমিনীতিৰ বিৰুদ্ধে বৃহৎ পৰিমাণৰ মাটি পুঁজিপতি-বণিয়া গোষ্ঠীৰ হাতলৈ যাব বুলি কয়। শাসনাধিষ্ঠিত বিজেপি চৰকাৰে ইতিমধ্যে বিশাল পৰিমাণৰ ভূ-সম্পত্তি ৰামদেৱৰ দৰে ব্যৱসায়ীৰ হাতত তুলি দিয়াৰ অভিযোগ উত্থাপন কৰে৷

দেবেন ভট্টাচাৰ্যই কয় যে অসমত ঔদ্যোগীকৰণৰ প্ৰয়োজন সম্পৰ্কে কাৰো দ্বিমত নাই৷ সৰ্বানন্দ সোণোৱাল চৰকাৰৰ যোৱা ৪ বছৰৰ শাসনকালত নতুন শিল্পোদ্যোগ গঢ়ি উঠাৰ সলনি দুটাকৈ কাগজ কলকে ধৰি বহুতো প্ৰতিষ্ঠান বন্ধ হৈ পৰিছে৷ এইখন চৰকাৰে এতিয়া হঠাতে অতি ক্ষুদ্ৰ-ক্ষুদ্ৰ আৰু মজলীয়া শিল্প-প্ৰতিষ্ঠান (MSME)ক উৎসাহিত কৰাৰ নামত এখন অধ্যাদেশ জাৰি কৰাৰ সিদ্ধান্ত গ্ৰহণ কৰিছে৷ এই সিদ্ধান্ত অনুসৰি এই ধৰণৰ শিল্প-প্ৰতিষ্ঠান স্থাপন কৰাৰ বাবে কোনো ধৰণৰ অনুমতি বা লাইচেঞ্চৰ প্ৰয়োজন নহ’ব৷ এখন আৱেদনৰ ভিত্তিতে এনে প্ৰতিষ্ঠান স্থাপন আৰু তিনি বছৰ চলোৱাৰ বাবে সুযোগ লাভ কৰিব৷

এই সিদ্ধান্তৰ সবাতোকৈ ভয়াৱহ দিশটো হ’ল এনে শিল্প-প্ৰতিষ্ঠান স্থাপনৰ নামত যিকোনো কৃষি ভূমিৰ চৰিত্ৰ সলনি কৰি হস্তান্তৰিত কৰিব পাৰিব৷ ইয়াৰ ফলত বৃহৎ পৰিমাণৰ মাটি পুঁজিপতি-বণিয়া গোষ্ঠীৰ হাতলৈ যাব।শাসনাধিষ্ঠিত বিজেপি চৰকাৰে ইতিমধ্যে বিশাল পৰিমাণৰ ভূ-সম্পত্তি ৰামদেৱৰ দৰে ব্যৱসায়ীৰ হাতত তুলি দিছে। চৰকাৰৰ এই নীতিয়ে কৃষি আৰু কৃষকসমাজলৈ যে সৰ্বনাশ মাতি আনিব পাৰে সেয়া ধুৰূপ৷ অসমৰ কৃষিজগত যে এটা অৱহেলিত খণ্ড সেয়া সকলোৱে জনা কথা৷ ৰাজ্যখনৰ গাঁও অঞ্চলৰ অৰ্থনীতিৰ শোচনীয় অৱস্থাৰ বাবেই যে অসমৰ লাখ লাখ যুৱক-যুৱতী জীৱিকাৰ সন্ধানত অইন ৰাজ্যলৈ যাবলগীয়া হৈছে সেয়া কোভিড-১৯ৰ দুৰ্যোগৰ সময়ত আৰু স্পষ্টভাৱে ওলাই পৰিছে৷ কোভিড-১৯ৰ সংক্ৰমণ আৰু লক-ডাউনৰ সময়ছোৱাত এই কথাও ওলাই পৰিছে যে অসমৰ কৃষিখণ্ড দুৰ্বল হোৱা সত্ত্বেও সংকটৰ সময়ত অৰ্থনীতিৰ প্ৰাথমিক খণ্ড–কৃষিয়েই অসমৰ এটা বৃহৎ অংশৰ লোকক দুৰ্ভিক্ষৰ পৰা ৰক্ষা কৰিছে৷

চিপিআইম দলে সেয়েহে কৃষি খণ্ডৰ উন্নয়ন আৰু কৃষকৰ আয় বৃদ্ধি চৰকাৰৰ প্ৰাথমিকতা হোৱা উচিত বুলি৷ অসমত বিপুল সংখ্যাগৰিষ্ঠ জনসাধাৰণ যিহেতু কৃষিজীৱী, সেয়ে তেওঁলোকৰ ক্ৰয় ক্ষমতা বৃদ্ধিয়েহে ৰাজ্যখনত শিল্পোদ্যোগ সম্প্ৰসাৰণৰ দৃঢ়ভিত্তি স্থাপন কৰিব পাৰে৷ কিন্তু বিনাবাধাই কৃষিভূমিক বাণিজ্যিক বা ঔদ্যোগিক কাৰণত ব্যৱহাৰ কৰাৰ যি সুযোগ দিব বিচাৰিছে, সি অৱশেষত কৃষিখণ্ডলৈ ভয়ংকৰ দুৰ্যোগ মাতি আনিব৷ আৰ্থিকভাৱে জুৰুলা কৃষকসকলৰ মাটি মাটিৰ দালাল বা ভূ-মাফিয়াই সহজে আৰু অতি কমদামত ক্ৰয় কৰাৰ পথ এই অধ্যাদেশে প্ৰশস্ত কৰিব৷ শিল্পোদ্যোগৰ নামত ক্ৰয় কৰা মাটি ভৱিষ্যতে বাণিজ্যিকভাৱে অধিক দামত বিক্ৰী কৰাৰ সুযোগো সৃষ্টি হ’ব বুলি কয় বাও দলটোৱে৷

তদুপৰি যধে-মধে শিল্পোদ্যোগ স্থাপনৰ অনুমতি প্ৰদান ব্যৱস্থাই পৰিৱেশ দূষিত আৰু ক্ষতিগ্ৰস্ত কৰাৰো পুৰামাত্ৰাই সম্ভাৱনা আছে৷ ইটাভাটা, কোৱেৰী আৰু অন্যান্য অতি প্ৰদূষণ বিয়পোৱা কল-কাৰখানা যধে-মধে স্থাপন কৰাৰ সুযোগ দিয়াৰ ফলত বিস্তীৰ্ণ খেতিপথাৰ আৰু গ্ৰামাঞ্চললৈ যি দুৰ্যোগ কঢ়িয়াই আনে সেয়া জনসাধাৰণে নিজৰ অভিজ্ঞতাৰ পৰাই ইতিমধ্যে জানিব পাৰিছে৷ ভাৰতৰ কমিউনিষ্ট পাৰ্টি (মাক্সৰ্বাদী)ৰ ৰাজ্যিক সমিতিয়ে শিল্পোদ্যোগ স্থাপনৰ নামত চৰ্তহীনভাৱে কৃষিভূমিৰ চৰিত্ৰ সলনি কৰাৰ বাবে ৰাজ্যখনৰ বিজেপি নেতৃত্বাধীন চৰকাৰে লোৱা সিদ্ধান্তৰ তীব্ৰ বিৰোধিতা কৰিছে আৰু এই সিদ্ধান্ত প্ৰত্যাহাৰৰ দাবী জনায়৷

শিল্পোদ্যোগ স্থাপনৰ প্ৰয়াস চলোৱাৰ সমান্তৰালভাৱে কৃষিখণ্ডত যথাযথ বিনিয়োগ কৰিবলৈ আৰু কৃষকৰ অধিকাৰ সুৰক্ষিত কৰাৰ বাবে দীৰ্ঘদিন ধৰি ভোগ-দখল কৰি থকা মাটিৰ পট্টাদান কৰাৰ বাবে দ্ৰুত ব্যৱস্থা গ্ৰহণ কৰিবলৈ দলটোৱে চৰকাৰৰ ওচৰত দাবী জনাইছে৷ কৃষি ভূমি নিৰ্বিচাৰে পুঁজিপতি-বণিয়া গোষ্ঠীলৈ হস্তান্তৰ কৰাৰ বাবে অনুমতি দিয়াৰ সিদ্ধান্ত বাতিল কৰাৰ দাবীত অসম ৰাজ্যিক কৃষক সভাই ৭ জুলাইত সাব্যস্ত কৰিবলগীয়া প্ৰতিবাদী কাৰ্যসূচীক চিপিআইএমে সমৰ্থন কৰে৷