নুমলীগড়ঃ আনহে নালাগে কৃষি মন্ত্ৰী অতুল বৰাৰ সমষ্টিতে এতিয়া দৰিদ্ৰ কৃষকে হাহাকাৰ কৰিব লগা হৈছে৷ কৃষিমন্ত্ৰীয়ে নিজ সমষ্টিত এটা বান্ধ নিৰ্মাণ নকৰাৰ ফলত কৃষকে কঁপালৰ ঘাম মাটিত পেলাই কৰা খেতি ডৰা কেঁচাতে কাটি আনিব লগা হৈছে৷ কৃষকৰ এনে আলাই-আথানি হৈছে নুমলীগড়ৰ সমীপৰ দিচৈ গাঁও পঞ্চায়তৰ কেইবা খেতিয়কৰ।

দিচৈ গাঁও পঞ্চায়তৰ খেতিয়কে দেহৰ তেজ পানী কৰি শ শ বিঘা বড়ো ধানৰ খেতি কৰিছিল৷ কিন্তু ভৰ বাৰিষা কেঁচাতে ধান সমূহ কাটিব লগীয়া হৈছে অসহায় কৃষকে। দিচৈ গাঁও পঞ্চায়তত কৃষি পথাৰত পানী প্ৰয়োজনত যোগান কৰিব পৰাকৈ কোনো ব্যৱস্থা নাই৷ ব্ৰহ্মপুত্ৰৰ পানী যেতিয়াই ইচ্ছা তেতিয়াই সোমাই আহি খেতি পথাৰ অনিষ্ট কৰে৷ এলেংমাৰী নামৰ ঠাইত বান্ধ এটা নিৰ্মাণ কৰিলে কৃষকৰ পানীৰ সমস্যা সমাধান হয়৷ এলেংমাৰী বান্ধ নিৰ্মাণ কৰিলে কৃষকে প্ৰয়োজনত পানী পথাৰত সোমাই লব পাৰে আৰু প্ৰয়োজন নাথিকেল পানীৰ প্ৰবেশ বন্ধ কৰিব পাৰে৷ ৰাইজে দীৰ্ঘদিন ধৰি এলেংমাৰী নামৰ বান্ধ নিৰ্মাণ কৰিবলৈ দাবী জনাই অহাৰ পিছতো কৃষকৰ কথাক গুৰুতিব প্ৰদান নকৰিলে৷

নিজ সমষ্টিৰ কৃষকৰ সমস্যা সমাধান কৰিবলৈ গুৰুত্ব নিদিয়া কৃষিমন্ত্ৰীয়ে ছ’চিয়েল মিডিয়াত নিতৌ ফটো দি কাম কৰি থকা বুলি জাহিৰ কৰি বাঃ বাঃ লবলৈ চেষ্টা কৰি আহিছে৷ এলেংমাৰী বান্ধৰ ওপৰেৰে এতিয়া বৈ আহিছে ব্ৰহ্মপুত্ৰ নদীৰ বাঢ়নী পানী। ফলত চপৰা-চপৰে খহিছে নদীৰ পাৰ। এলেংমাৰী কৃষি বান্ধটো সময়মতে মেৰামতি নকৰাৰ বাবে এতিয়া নিকৰি, এলেংমাৰী, গুটুং, নৈ-গাঁও, বৰতল, গৰৈমাৰি আদি কৰি প্ৰায় ৫০ খনৰো অধিক গাঁও শ শ বিঘা বড়ো ধানৰ খেতি পানীৰ তল যোৱাৰ উপক্ৰম হৈছে। খেতি পথাৰ বুৰাই পেলোৱাৰ ভয়ত কৃষকে চকুপানী টুকি কেঁচা বড়ো ধান চপাই ঘৰলৈ আনিছে৷ কৃষক তথা স্থানীয় ৰাইজে কৃষি মন্ত্ৰী অতুল বৰাই নিজ সমষ্টিৰ দৰিদ্ৰ কৃষকৰ সমস্যাক গুৰুত্ব নিদিয়াত তীব্ৰ ক্ষোভ ব্যক্ত কৰে।