ডিজিটেল ডেস্কঃ জ্ঞানপীঠ বঁটা বিজয়ী নীলমণি ফুকনৰ গোপন পত্ৰৰ ৰহস্য খোল খাব ৩ ফেব্ৰুৱাৰী৷ শুকুৰবাৰে কবি নীলমণি ফুকনে ২০০৪ চনতে তেওঁৰ বিৰুদ্ধে হোৱা বৌদ্ধিক ষড়যন্ত্ৰৰ কথা প্ৰকাশ কৰি এখন পত্ৰ লিখি সাংবাদিক নিত্য বৰাৰ হাতত জমা দিছিল আৰু তেওঁৰ মৃত্যুৰ পিছতহে সেই ‘বন্ধ খাম’ খুলিবলৈ পৰামৰ্শ দিছিল। নীলমণি ফুকনৰ পৰিয়ালে কবিৰ আদ্যশ্ৰাদ্ধৰ পাছত খামটো খুলিবলৈ আহ্বান জনোৱা পৰিপ্ৰেক্ষিতত সাংবাদিক নিত্য বৰাই ৩১ জানুৱাৰী পিছত সেই ‘বন্ধ খাম’ৰ ৰহস্য ৰাজহুৱা কৰাৰ সিদ্ধান্ত লৈছিল৷ সেই মৰ্মে ৩ ফেব্ৰুৱাৰীত গুৱাহাটী প্ৰেছ ক্লাব বুকিং কৰা হৈছে আৰু সাংবাদিকৰ উপস্থিতিত কবিৰ মনৰ বেথা মুকলি কৰিব নিত্য বৰাই। কবি নীলমণি ফুকনে স্পেনিছ কবিৰ কবিতা নকল কৰা বুলি অভিযোগ উৎথাপন কৰা বুলি তেওঁৰ একাংশ প্ৰতিনিধিয়ে তেওঁৰ ওপৰত মানসিক নিৰ্যাতন চলোৱা বুলি ৰাজহুৱাভাৱে অপদস্থ কৰিছিল। এনে পৰিস্থিতিত কবিয়ে নিজাকৈ অনুসন্ধান চলাই সমগ্ৰ ষড়যন্ত্ৰ ধৰা পেলাইছিল আৰু বাতৰি কাকতত বিজ্ঞাপন দি প্রকৃত সত্য ধৰা পেলাইছিল। কিন্তু কোন কোন ষড়যন্ত্ৰকাৰীয়ে তেওঁৰ বিৰুদ্ধে অপপ্ৰচাৰ  চলাইছিল সেই কথা কবিয়ে ৰাজহুৱা কৰা নাছিল। এই ষড়যন্ত্ৰ এজন বিখ্যাত কবি আৰু তেওঁৰ জোৱাই জড়িত থকাৰ অভিযোগ উঠিছিল। শুকুৰবাৰেহে গম পোৱা যাব প্ৰকৃত সত্য।