বোকাজানঃ যোৱা কেইটামান মাহ ধৰি কাৰ্বি আংলং জিলা পশুপালন বিভাগৰ দুৰ্নীতিৰ বিৰুদ্ধে সৰৱ ভুমিকা পালন কৰি অহা কাৰ্বি আংলং জিলাৰ অগ্ৰণী ছাত্ৰ সংগঠন সন্মিলিত কাৰ্বি আংলং জিলা ছাত্ৰ পৰিষদ চমুকৈ উছুকাই সোমবাৰে জিলাখনৰ সদৰ চহৰ ডিফু আৰু বকলীয়াঘাটত কাৰ্বি আংলং স্বায়ত্ব শাসিত পৰিষদৰ পশুপালন বিভাগৰ কাৰ্যবাহী সদস্য তৰেন্দ্ৰ ব্ৰহ্মৰ প্ৰতিকৃতি দাহ কৰে। পশুপালন বিভাগত অব্যাহত থকা দুৰ্নীতিৰ বিৰুদ্ধে সংগঠনটোৱে তীব্ৰ প্ৰতিবাদ সাব্যস্ত কৰে।

সোমবাৰে দিনৰ প্ৰায় ১১ বজাত ডিফু চহৰস্থিত ডিফু চিকিৎসা মহাবিদ্যালয়ৰ সমীপত তথা বকলীয়াঘাটৰ কাৰ্বি বজাৰত সংগঠনটোৰ নেতা-কৰ্মীসকলে কাৰ্যবাহী সদস্যগৰাকীৰ প্ৰতিকৃতি দাহ কৰে। কাৰ্যসূচীৰ নেতৃত্ব প্ৰদান কৰি সংগঠনটোৰ সভাপতি বিবিচন টেৰণে কাৰ্বি আংলং স্বায়ত্ব শাসিত পৰিষদৰ অন্তৰ্গত আটাইকেইটা চৰকাৰী বিভাগৰ ভিতৰতে পশুপালন বিভাগ সবাতোকৈ ব্যৰ্থ বিভাগ বুলি অভিহিত কৰি জিলা পশুপালন বিষয়া ডা০ দিলীপ মহন্তৰ অযোগ্যতা আৰু ব্যৰ্থতাৰ বাবে আজি এনে পৰিস্থিতিৰ সৃষ্টি হোৱা বুলি মন্তব্য কৰে।

আনহাতে বিভাগটোক নেতৃত্ব প্ৰদান কৰাত বিভাগটোৰ কাৰ্যবাহী সদস্য তৰেন্দ্ৰ ব্ৰহ্মই প্ৰদৰ্শন কৰা ব্যৰ্থতাৰ প্ৰতিবাদতে সংগঠনটোৱে এনে কাৰ্যসূচী হাতত লোৱা বুলি সভাপতিগৰাকীয়ে উল্লেখ কৰে। দুৰ্নীতিগ্ৰস্ত জিলা পশুপালন বিষয়াগৰাকীৰ বিৰুদ্ধে কাৰ্বি আংলং স্বায়ত্ব শাসিত পৰিষদ কৰ্তৃপক্ষই শীঘ্ৰে ব্যৱস্থা গ্ৰহণ নকৰিলে অনাগত দিনত ব্যাপক আন্দোলনৰ কাৰ্যসূচী গ্ৰহণ কৰাৰো হুংকাৰ দিয়ে ছাত্ৰ নেতাগৰাকীয়ে।

আনহাতে বকলীয়াঘাটত প্ৰতিবাদী কাৰ্যসূচীৰ নেতৃত্ব প্ৰদান কৰি নিজ মন্তব্যত সংগঠনটোৰ সাধাৰণ সম্পাদক জিণ্টু হাজৰিকাই দুৰ্নীতি মুক্ত অসম গঢ়াৰ প্ৰতিশ্ৰুতিৰে শাসনলৈ অহা বিজেপি চৰকাৰখনে জিলাখনৰ পশুপালন বিভাগৰ দুৰ্নীতিৰ বিৰুদ্ধে নীৰৱ ভুমিকা গ্ৰহণ কৰি অহা কাৰ্যই চৰকাৰখনৰ দুৰ্নীতিবিৰোধী মুখা খোল খুৱাই দিয়া বুলি ক্ষোভ প্ৰকাশ কৰে। প্ৰতিবাদকাৰীসকলে লগতে তৰেন্দ্ৰ ব্ৰহ্ম মুৰ্দাবাদ, ডা০ দিলীপ মহন্ত মুৰ্দাবাদ, উছুকা চিন্তাবিদ আদি শ্ল’গানেৰে পৰিবেশ উত্তাল কৰি তোলে।