গোলাঘাটঃ গোলাঘাটত এইবাৰ কভিডত আক্ৰান্ত হ’ল মন্ত্ৰীৰ দেহৰক্ষী । জিলা স্বাস্থ্য বিভাগৰ এক সূত্ৰে জানিব পৰা মতে ৰাজ্য চৰকাৰৰ কৃষি মন্ত্ৰী অতুল বৰাৰ লগত থকা এজন দেহৰক্ষীৰ দেহত  আজি কভিড-১৯ ভাইৰাছৰ অৱস্থিতি ধৰা পৰিছে।

কালি মন্ত্ৰী অতুল বৰা সহ তেওঁৰ লগত থকা সকলো নিৰাপত্তা ৰক্ষী ,গাড়ী চালক,অন্যান্য সহযোগীৰ লগতে গোলাঘাট আবৰ্ত ভৱনৰ কৰ্মচাৰী সকলৰ স্বাৱ সংগ্ৰহ কৰিছিল জিলা স্বাস্থ্য বিভাগে ।এই মুঠ ৩৬ টা স্বাৱ ফলাফলত আজি মন্ত্ৰী অতুল বৰাৰ কভিড নিগেটিভ অহাৰ লগতে অন্যান্য সহযোগী সকলৰো ফলাফল নিগেটিভ আহিছে ।

কিন্তু ইয়াৰ মাজতে এজন দেহৰক্ষীৰ স্বাৱ ৰিপৰ্ট পজিটিভ আহে । জিলা স্বাস্থ্য বিভাগে লগে লগে আক্ৰান্ত দেহৰক্ষীজনক গোলাঘাট কভিড হস্পিটেললৈ আনি চিকিৎসাৰ ব্যৱস্থা কৰিছে। আক্ৰান্ত দেহৰক্ষীজন কেনেকৈ সংক্ৰমিত হ’ল সেয়া এতিয়াও স্বাস্থ্য বিভাগ নিশ্চিত হোৱা নাই । ইফালে আজি গোলাঘাট জিলাত মন্ত্ৰীৰ দেহৰক্ষীজনকে ধৰি মুঠ ১০ জন লোকৰ দেহত কভিড-১৯ ভাইৰাছ ধৰা পৰিছে ।

ইয়াৰ ভিতৰত ৯ গৰাকী লোকেই বহিঃৰাজ্যৰ পৰা অহা বুলি জানিব পৰা গৈছে । আক্ৰান্ত লোক কেইজন দিল্লী আৰু চেন্নাইৰ পৰা আহি বোকাখাট, সৰুপথাৰৰ  আৰু গোলাঘাটত কোৱাৰেন্টাইন হৈ আছিল । আনহাতেদি,বৰ্তমানলৈকে জিলাখনত মুঠ ৫৯৪ গৰাকী লোকৰ দেহত কভিড ভাইৰাছৰ অৱস্থিতি ধৰা পৰিছিল ।

ইয়াৰে বৰ্তমান ৫৪ জন ৰোগীহে চিকিৎসালয়ত  চিকিৎসাধীন হৈ আছে । তাৰে ভিতৰত ৪৯ গৰাকী গোলাঘাট কভিড হস্পিটেলত, ৪ গৰাকী কহৰা মডেল হস্পিটেলত আৰু ২ গৰাকী যোৰহাট চিকিৎসা মহাবিদ্যালয়ৰ কভিড হস্পিটেলত চিকিৎসাধীন হৈ আছে । আনহাতেদি, বৰ্তমানলৈকে জিলাখনৰ ৫৪০ গৰাকী কভিড আক্ৰান্তই আৰোগ্য লাভ কৰি ঘৰলৈ ওভতি গৈছে ।