বিশ্বৰ জনপ্ৰিয় পেছাদাৰী কুস্তি কোম্পানী ৱৰ্ল্ড ৰেছলিং এণ্টাৰটেইনমেণ্ট চমুকৈ ডব্লিউডব্লিউইত অংশ লোৱা ভাৰতৰ আন এগৰাকী খেলুৱৈ খুব চৰ্চাত৷ গ্ৰেট খালিৰ পিছতে ৰিংকু সিঙ ওৰফে বীৰ মহনে ডব্লিউডব্লিউইত ভাৰতৰ নাম উজলাই তুলিছে। উত্তৰ প্ৰদেশৰ ভাদোহী জিলাৰ বাসিন্দা ৰিংকুৱে জেভেলিন থ্ৰো আৰু বেছবলত আশ্চৰ্যকৰ প্ৰদৰ্শন কৰি চাঞ্চল্যৰ সৃষ্টি কৰাৰ পিছতে কুস্তিত এতিয়া বিদেশৰ মাটিত ব্যাপক চৰ্চিত হৈছে।

জেভলিন থ্ৰোয়িংৰে কেৰিয়াৰ আৰম্ভ কৰিছিল ৰিংকু সিঙে৷ বেছবলৰ জৰিয়তে টকা উপাৰ্জন কৰিছিল৷ পিছত ডব্লিউডব্লিউইত অংশ ল’বলৈ আমেৰিকালৈ যায়৷ এতিয়া কুস্তিৰ এইখন জগতত বিস্ময়কৰ প্ৰদৰ্শন কৰি বিশ্বৰ এগৰাকী শীৰ্ষৰ পাৰদৰ্শি হিচাপে স্বীকৃতি লাভ কৰিবলৈ সক্ষম হৈছে। ডব্লিউডব্লিউইত জনপ্ৰিয়তা অৰ্জন কৰা খালিৰ পিছত দ্বিতীয় ভাৰতীয় খেলুৱৈ ৰিংকু৷ ৰিংকু ডব্লিউডব্লিউইত ২০১৮ চনৰ পৰা সক্ৰিয় হৈ আছে৷ কিন্তু কিছু সময়ৰ বাবে বিৰতি লোৱাৰ পিছতে পুনৰ প্ৰত্যাৱৰ্তন কৰি প্ৰথমখন খেলতে ৰে-মিষ্ট্ৰিঅ’ আৰু পুত্ৰক ধৰাশয়ী কৰে। ফলত সামাজিক মাধ্যমত ব্যাপক চৰ্চালৈ আহে৷

ৰিংকু জনপ্ৰিয় হোৱাৰ কাৰণটো হ’ল শৰীৰৰ গঠন, দীঘল চুলি, দাড়িৰ আৰু কপালৰ তিলক। ক’লা কাপোৰ বা গেৰুৱা কাপোৰ পিন্ধি কুস্তিত অংশ লোৱা ৰিংকু ভগৱান শিৱৰ মহান ভক্ত।

ৰিংকুৱে শৰীৰত বহু টেটু আঁকি লৈছে। আটাইতকৈ বিশেষ টেটুটো হ’ল মাকৰ। মাকক বুকুত ডাঙৰকৈ আঁকিছে। এই টেটুটোৱে ব্যক্তিত্বক আৰু অধিক আকৰ্ষণীয় কৰি তুলিছে।

ৰিংকু সিং ৰাজপুত সম্প্ৰদায়ৰ৷ ১৯৮৮ চনৰ ৮ আগষ্টত উত্তৰ প্ৰদেশৰ ভাদোহী জিলা হলপুৰ গাঁৱত জন্ম। এজন পেছাদাৰী মল্লযোদ্ধা হোৱাৰ উপৰিও এজন প্ৰাক্তন পেছাদাৰী বেছবল খেলুৱৈ।

ৰিংকু সিঙে ২০০৮ চনত বেছবলৰ প্ৰতিভা সন্ধান অনুষ্ঠান ‘দ্য মিলিয়ন ডলাৰ আৰ্ম’ত অংশগ্ৰহণ কৰি জেভলিন দলিওৱাৰ অভিজ্ঞতা লাভ কৰিছিল। কিন্তু ইয়াৰ পূৰ্বে কেতিয়াও বেছবল খেলা নাছিল৷ শক্তিশালী শৰীৰ আৰু গতিৰ বাবে প্ৰতিভা প্ৰদৰ্শন কৰি প্ৰতিযোগিতাত জিকিছিল। বেছবলত কেৰিয়াৰ গঢ়িবলৈ আমেৰিকালৈ যায়। ২০০৯ চনৰ পৰা ২০১৬ চনলৈ বিশ্বজুৰি বহু লীগত অংশগ্ৰহণ কৰে।

ৰিংকু সিঙৰ পিতৃ ব্ৰহ্মডেন সিঙ ট্ৰাক চালক আছিল। ৰিংকুৱে সৰু থাকোতে গাঁৱৰ কিছু লোকে বৰ্শা দলিয়াই৷ গাঁৱৰ লোকে দলিওৱা বৰ্শা তুলি অনা কাম কৰিছিল। লাহে লাহে ৰিংকুৱেও অনুশীলন আৰম্ভ কৰে। কেইদিনমানৰ পিছত উন্নত প্ৰদৰ্শন কৰিবলৈ আৰম্ভ কৰে৷

চাৰিজন ভাতৃৰ ভিতৰত কনিষ্ঠ ৰিংকুৰ ওচৰত বৰ্শা কিনিবলৈ টকা নাছিল। ট্ৰাকৰ পুৰণি ৰড গলাই পাঁচ কিলোগ্ৰামৰ জেভলিন নিজেই প্ৰস্তুত কৰি অনুশীলন আৰম্ভ কৰে। ইয়াৰ পিছতে আজিৰ বীৰ মহনে জেভলিন থ্ৰোত জুনিয়ৰ নেচনেলছত পদক লাভ কৰে।

ৰিংকুৱে ২০১৮ চনত বেছবল এৰি মল্লযুদ্ধত মনোনিবেশ কৰিবলৈ আৰম্ভ কৰে। ২০১৮ চনত ডব্লিউডব্লিউইত যোগদান কৰে। প্ৰাৰম্ভিক পৰ্যায়ত ৰিংকু ডব্লিউডব্লিউইত ৰিংকু নামেৰে বিখ্যাত আছিল। তাৰ পিছতে ডব্লিউডব্লিউইত আন কেইবাগৰাকী খেলুৱৈৰে এটা দল গঠন কৰে। বীৰ মহনৰ নেতৃত্বৰ দলটোৱে একেৰাহে বহু মেচ জিকে। কেইটামান কাৰণত ২০২১ চনত দলটোৰ সৈতে পৃথক হয় বীৰ মহন। ডব্লিউডব্লিউইৰ সৈতে সংযুক্ত হৈ সুকীয়াকৈ খেলি নিজকে বীৰ গ্ৰেট নাম দিয়ে।

ৰিংকুৱে পুনৰ ৰিঙলৈ উভতি অহাৰ পিছতে ডব্লিউডব্লিউইৰ কোনো মল্লযোদ্ধা দুই মিনিটো তিষ্ঠি থাকিব পৰা নাছিল। বীৰ মহনে যোৱা তিনি সপ্তাহত তিনিজন মল্লযোদ্ধাক ভায়বহভাৱে পৰাস্ত কৰিছে। ১১৯ ছেকেণ্ডত ৰে-মিষ্ট্ৰিঅ’ৰ পুত্ৰ ডেমিনিক মিষ্ট্ৰিঅ’, ১১০ ছেকেণ্ডত জেফ ব্ৰুকছ আৰু মাত্ৰ ৩৬ ছেকেণ্ডত ছেম চামাদাৰ্ছক নক আউট কৰে।

ৰিংকু ভগৱান শিৱৰ এজন মহান ভক্ত হিচাপে জনাজাত। ইনষ্টাগ্ৰাম একাউণ্টত শিৱ পূজাৰ বহু ফটো আৰু ভিডিঅ’ শ্বেয়াৰ কৰে৷ যিয়ে স্পষ্ট কৰে যে ভগৱান শিৱৰ ভক্ত। ফটো সমূহত প্ৰায়ে শিৱৰ পূজা কৰা দেখা যায়।

জেভেলিন থ্ৰো, বেছবল আৰু কুস্তিত আশ্চৰ্যকৰ কাম কৰা ৰিংকুৱে ধনুৰ্বিদ্যাতো দক্ষ। এটা ভিডিঅ’ত শ্বুটিং দক্ষতা প্ৰদৰ্শন কৰি থকা দেখা যায়।