কংগ্ৰেছৰ প্ৰাক্তন ৰাজ্যিক সভাপতি, প্ৰাক্তন ৰাজ্যসভাৰ সাংসদ ৰিপুণ বৰাই যোগ দিব আম আদমী পাৰ্টীত৷ এই দাবী কৰিছে অসম জাতীয় পৰিষদৰ নেতা দুলু আহমেদে৷ দুলু আহমেদে ফেচবুকত পোষ্ট দি এই দাবী কৰিছে৷ আজি দুপৰীয়া এটা ফেচবুক পোষ্ট যোগে দুলু আহমেদে এই দাবী কৰাৰ পিছতে ৰাজ্যৰ ৰাজানীতিত তীব্ৰ চাঞ্চল্যৰ সৃষ্টি হৈছে৷ দুলু আহমেদে ফেচবুক পোষ্ট যোগে দাবী কৰি কয় ‘‘অসম কংগ্ৰেছৰ প্ৰাক্তন সভাপতি তথা অসমৰ জনপ্ৰিয় এই গৰাকী নেতাই অতি সোনকালে আম আদমী পাৰ্টিত যোগদান কৰাৰ উদ্দেশ্যে আদমী পাৰ্টিৰ শীৰ্ষ নেতৃত্বক মালিগাঁৱৰ সঞ্জীবিনি হস্পিতালত লগ কৰাৰ ভিডিঅ’ মোৰ তাত আহি পৰিছে। উদ্দেশ্য কেৱল এটাই, যেনেতেনে অন্য ৰাজ্যৰ পৰা ৰাজ্যসভাৰ সাংসদ হ’ব লাগে।’’ এই ফেচবুক পোষ্টে চাঞ্চল্যৰ সৃষ্টি কৰাৰ পিছতে ৰিপুণ বৰাই প্ৰতিক্ৰিয়া প্ৰকাশ কৰি আম আদমী পাৰ্টীত যোগদানৰ প্ৰচাৰ মিছা বুলি কয়৷ ৰিপুণ বৰাই ফেচবুক যোগেই প্ৰত্যুত্তৰ দি কয় ‘‘ছ’চিয়েল মিডিয়াত এজন ব্যক্তিয়ে মই আপত যোগদান কৰিম বুলি এক ভিত্তিহীন, পোষ্ট দিয়া মোৰ দৃষ্টি গোচৰ হৈছে। এই কথা সম্পূৰ্ণ অসত্য। মই কংগ্ৰেছ দলৰ এজন নিষ্ঠাবান সৈনিক আৰু এই দলৰ প্ৰতি মই দায়বদ্ধ’’৷