সৰুপথাৰঃ কোৱিড-১৯ৰ প্ৰকোপৰ পৰা জনগণক ৰক্ষা কৰিবৰ বাবে চৰকাৰে লক-ডাউন ঘোষণা কৰাত ৰাজ্যৰ শিক্ষানুষ্ঠানসমূহ আজিও বন্ধ হৈ আছে৷ শিক্ষানুষ্ঠান বন্ধ থকাত কণ কণ শিশুসকল ঘৰতে আৱদ্ধ হৈ পৰিছে৷ অধিকাংশ নগৰাঞ্চলৰ কণ কণ শিশুৱেই মোৱাইল, কম্পিউটাৰ, টিভি, ভিডিঅ’ গ্ৰেমত সময় পাৰ কৰিছে৷ অত্যাধিক মোৱাইল টিভি আদি ব্যৱহাৰে সন্তানৰ শাৰীৰিক-মানসিক ক্ষতিৰ আশংকা কৰিছে অভিভাৱকসকল৷

ইয়াৰ বিপৰীতে ক’ৰোনাকালত বিদ্যালয়ৰ পৰা আঁতৰত থকা গ্ৰাম্যাঞ্চলৰ শিশুসকলৰ মাজত দেখা গৈছে এক বিপৰীত দৃশ্য৷ যি দৃশ্য প্ৰত্যক্ষ কৰি আপুনিও হয়টো ঘূৰি যাব শৈশৱলৈ৷ আপোনাৰ-মোৰ শৈশৱ হয়তো পাৰ হৈছিল ধুলি বালিৰ মাজেতেই৷ কিন্তু এতিয়া সময় সলনি হ’ল৷ বিজ্ঞান প্ৰযুক্তিবিদ্যাৰ পিঠিত উঠি ম’বাইল, কম্পিউটাৰ, টিভি, ভিডিঅ গেম আহিল৷

সমনীয়াৰ সৈতে ধুলি-বালিত খেলি পখিলা খেদা সময় এতিয়া নাপাই বুলিয়েই ক’ব পাৰি৷ প্ৰযুক্তি বিদ্যাৰ দ্ৰুত উন্নয়নৰ পিছতো মোবাইল, কম্পিউটাৰ বিহীন ভাৱে আজিও ধূলি-বালিত খেলিয়েই সময় পাৰ কৰিছে ধনশিৰি মহকুমাৰ বিভিন্ন গ্ৰাম্যাঞ্চলৰ বহু শিশুৱে৷ বিদ্যালয় বন্ধৰ বাবে এজাক শিশু ব্যস্ত সমনীয়াৰ সৈতে খেল ধেমালিত৷ খেলৰ কোনো সীমা সংখ্যা নাই৷ কোনোবা কেইজনে যদি ধকুৱাৰ গাড়ীত উঠি উপভোগ কৰিছে চৰম আনন্দ৷ আন কেইজনমানে আকৌ চাইকেলৰ টায়াৰৰ গাড়ী চলাই সমনীয়াৰ সৈতে প্ৰতিযোগিতাত নামিছে৷

ক’ৰোনাৰ আতংকৰ মাজতো ৰচি টনা, কাবাডি, ধূলি মাটিৰে ভাত ৰন্ধা, দৰা-কইনা সাজি বিয়া পতা আদি খেল খেলিছে চেমনীয়া সৈতে৷ ফটা কাগজ অথবা গছ পাতৰ টকাৰ বিনিময়ত বিক্ৰী কৰিছে সাজিঁ লোৱা দোকানখনৰ বিভিন্ন বয়-বস্তু৷ যিবোৰ খেল আজি তথাকথিত আধুনিক সমাজ আৰু নগৰাঞ্চলৰ বাবে প্ৰায় পাহৰণিৰ গৰ্ভত৷ একাংশ শিশুৱে নিজৰ ঘৰতে সাঁজিছে দোকান৷ শাক পাচলিকে ধৰি বিভিন্ন সা-সামগ্ৰী বিক্ৰী কৰি আপোন পাহৰা হৈ পৰিছে৷ এইদৰেই ক’ৰোনা মহামাৰীৰ এই আতংকৰ কালত বিদ্যালয়ৰ শ্ৰেণী কোঠাৰ পৰা আঁতৰি থাকি ধনশিৰি মহকুমাৰ শিশুসকলে এনেদৰে ৰং-ধেমালি কৰি সময় পাৰ কৰা পৰিলক্ষিত হৈছে৷