গুৱাহাটীঃ আজিৰে পৰা আৰম্ভ হৈছে অসম বিধানসভাৰ অধিবেশন৷ অসম মন্ত্ৰীসভাৰ মন্ত্ৰীকে ধৰি ৰাজ্যৰ প্ৰায় কেইবাগৰাকী বিধায়ক ক’ৰোনাত আক্ৰান্ত হৈ থকাৰ সময়তে আজিৰে পৰা বিধানসভাৰ অধিবেশন অনুষ্ঠিত হৈছে৷ এইবাৰ অধিবেশনত এক নতুন পৰিস্থিতি দেখা যাব৷ বিধানসভাত ৰাজ্যৰ দুই প্ৰধান বিৰোধী কংগ্ৰেছ আৰু ইউডিএফ একেলগে বহিব৷ বিৰোধীয়ে শক্তিশালী ভাৱে ক’ৰোনা, আৰ্থিক অৱস্থা, সংস্থাপন আদি বিষয়ত চৰকাৰক ঘেৰিবলৈ চেষ্টা কৰিব৷

ইফালে শাসক পক্ষই পূৰ্বৰে পৰা ইউডিএফ আৰু কংগ্ৰেছৰ মিত্ৰতাক অসমৰ বাবে অশনি সংকেট বুলি কৈ অহাৰ দৰেই বিধানসভাৰ মজিয়াতো ৰোধ কৰিবলৈ চেষ্টা কৰিব৷ এই অধিবেশনত প্ৰায় ১৯ খন বিধেয়ক উত্থাপন হ’ব৷ চাৰিদিনীয়া অধিবেশনত কেনেদৰে ১৯খন বিধেয়ক উত্থাপন কৰি গৃহীত কৰিব সেয়া লক্ষ্যণীয় হ’ব৷ বিধানসভাত সময় কম আৰু অধিক সংখ্যাক বিধেয়কে বিপাঙত পেলাব শাসকীয় দল কেইটাক৷

২০১৬ চনৰ বিধানসভাৰ নিৰ্বাচনৰ পিছত বিৰোধীক একত্ৰিত ভাৱে দেখা পোৱা যাব বিধানসভাৰ মজিয়াত৷ ২১ৰ নিৰ্বাচনত মিত্ৰজোঁটত বান্ধ খাই বিজেপিৰ বিৰুদ্ধে যুঁজ দিবলৈ সাজু হোৱা কংগ্ৰেছ আৰু ইউডিএফে বিধানসভাৰ অধিবেশনত শাসক পক্ষৰ বিৰুদ্ধে একত্ৰিত হৈ মাত মাতিব৷ ইফালে মন্ত্ৰী ছুম ৰংহাং, প্ৰাক্তন মুখ্যমন্ত্ৰী তৰুণ গগৈ, বিধায়িকা অজন্তা নেওগ, কমল সিং নাৰ্জাৰী, ভৱেন ভঁৰালীকে ধৰা কেইবাগৰাকী বিধায়ক ক’ৰোনা পজিটিভ ধৰা পৰাত চিকিৎসাধীন হৈ আছে৷

তাৰ পিছতো আজিৰে পৰা অনুষ্ঠিত হোৱা অসম বিধানসভাৰ অধিবেশন চাৰিদিনীয়াকৈ চলিব৷ ০৩ চেপ্তেম্বৰত সমাপ্ত হ’ব৷ বিশেষকৈ পৰিপূৰক দাবী মঞ্জুৰি প্ৰস্তাৱ উত্থাপন হ’ব এই অধিবেশনত৷