গুৱাহাটীঃ ইতিমধ্যে ৰাজ্যৰ মুখ্যমন্ত্ৰী সৰ্বানন্দ সোণোৱালে খিলঞ্জীয়া যুৱক ঋতুপৰ্ণ পেগুৰ হত্যাৰ তদন্তৰ দায়িত্ব চিআইডিক প্ৰদান কৰিছে। ৰাজ্যৰ মুখ্যমন্ত্ৰী সৰ্বানন্দ সোণোৱালে ঘটনাৰ তদন্তৰ দায়িত্ব চিআইডিক প্ৰদান কৰাত হত্যাকাণ্ডৰ কেইবাটাও ৰহস্য উদঘাটন হোৱাৰ লগতে এই হত্যা কাণ্ডই সমগ্ৰ অসম জোকাৰি গৈছে৷

তাৰ মাজতে গোলাঘাট জিলাৰ বৰপথাৰৰ টেঙানীৰ ঔ-গুৰি আলি ছিগা গাঁৱত যুৱ বাহিনী নামৰ সংগঠনটোৱে এই ঘটনাৰ বিৰুদ্ধে প্ৰতিবাদ সাব্যস্ত কৰে৷ পেগুৰ হত্যাকাৰীক শীঘ্ৰে ফাঁচী কাঠত ওলোমোৱাৰ দাবী উত্থাপন কৰি টেঙানী আলিছিগা গাঁৱৰ যুৱ বাহিনীয়ে প্ৰতিবাদ সাব্যস্ত কৰে৷ প্ৰতিবাদকাৰীসকলে হাতে হাতে বেনাৰ-কাৰ্ড লৈ পেগুৰ হত্যাকাৰীক ফাঁচী দিয়ক, আমাক ন্যায় লাগে আদি ধ্বনিৰে সমগ্ৰ অঞ্চল কঁপায় তোলে। স্থানীয় যুৱকসকলে কয় যে চিচিটিভিত সমগ্ৰ কাণ্ডৰ ধৰা পৰিছে। গতিকে তদন্তৰ কোনো কথাই নাহে৷ হত্যাকাৰীসকলক পোনে-পোনে ফাঁচী কাঠত ওলোমাব লাগে।

ৰাজধানী গুৱাহাটী মহানগৰীত চাৰিগৰাকী লোকে ডিঙি ৰেপী হত্যা কৰা কাণ্ডক সহজে ল’ব পৰা নাই অসমৰ ৰাইজে৷ যদি ৰাজ্যৰ ৰাজধানী গুৱাহাটী মহানগৰীত মানুহৰ জীৱন সুৰক্ষিত নহয় তেন্তে কোন ঠাইত সুৰক্ষিত হ’ব৷ যোৱা শুকুৰবাৰে নুনমাটিত দিন দুপৰতে ঋতুপৰ্ণ পেগুক হত্যা কৰাৰ পিছতে ব্যাপক প্ৰতিক্ৰিয়াৰ সৃষ্টি হোৱাৰ লগতে শনিবাৰে পুৱাই নুনমাটিত টিএমপিকেৰ নেতৃত্বত ৰাইজে প্ৰতিবাদ সাব্যস্ত কৰি হত্যা কাণ্ডত জড়িত লোকক ফাঁচী দিয়াৰ দাবী উত্থাপন কৰিছিল৷

উল্লেখ্য যে, এটা সামান্য কথাতে প্ৰথমে তৰ্কা-তৰ্কি তাৰ পিছতে ডেগাৰেৰে হানি-খুচি হত্যা কৰা হৈছিল ঋতুপৰ্ণ পেগুক। নুনমাটিৰ আৰমান ফাৰ্ণিচিং নামৰ দোকানখনৰ সন্মুখত সংঘটিত হৈছিল এই কাণ্ড। ঘটনাৰ সৈতে জড়িত আটাইকেইজন অভিযুক্তক গ্ৰেপ্তাৰ কৰি তদন্ত অব্যাহত ৰাখিছে আৰক্ষীয়ে৷