ডিজিটেল ডেস্কঃ উত্তৰ প্ৰদেশৰ চিকিৎসক কাফিল খানক শীঘ্ৰে মুকলি কৰাৰ নিৰ্দেশ দিছে এলাহাবাদ উচ্চ ন্যায়ালয়ে৷ জিম্মাৰ কাল বৃদ্ধি কৰা কাৰ্যক বেআইনী বুলি কৈ আদালতে শীঘ্ৰে মুকলি দিয়াৰ নিৰ্দেশ প্ৰদান কৰিছে৷ উত্তৰ প্ৰদেশৰ গোৰখপুৰৰ বিআৰডি চিকিৎসা মহাবিদ্যালয়ৰ প্ৰৱক্তা তথা শিশুৰোগ বিশেষজ্ঞ কাফিল খানক নাগৰিকত্ব সংশোধনী আইন, এনআৰচি, এনপিএ বিৰোধী আন্দোলনত অংশ লৈ বিদ্বেষমূলক ভাষণ প্ৰদান কৰাৰ অভিযোগত গ্ৰেপ্তাৰ কৰাৰ অন্তত ৰাষ্ট্ৰীয় সুৰক্ষা আইনৰ অধীনত গ্ৰেপ্তাৰ কৰা হৈছিল৷

এই বৰ্ষৰ ১০ ফেব্ৰুৱাৰীত আলীগড় আদালতে জামিন মঞ্জুৰ কৰিছিল কাফিল খানৰ৷ তাৰ পিছতে কাৰাগাৰৰ পৰা মুক্ত হোৱাৰ পূৰ্বেই ১৩ ফেব্ৰুৱাৰীত পুনৰ গ্ৰেপ্তাৰ কৰি খানৰ ওপৰত ৰাষ্ট্ৰীয় সুৰক্ষা আইন লগোৱা হৈছিল৷ এই আইনৰ অধীনত কোনো ধৰণৰ বিচাৰ নোহোৱাকৈ তিনিমাহ কাৰাগাৰত থাকিবলগীয়া হয়৷ ১২ আগষ্ট পৰ্যন্ত বৃদ্ধি পাই কাৰাৰুদ্ধ হৈ থকাৰ সময়৷ ২৯ জানুৱাৰীত পুনৰ মুম্বাইৰ পৰা উত্তৰ প্ৰদেশ আৰক্ষীয়ে গ্ৰেপ্তাৰ কৰি মথুৰা কাৰাগাৰত বন্দী কৰিছিল কাফিল খানক৷

আলীগড় বিশ্ববিদ্যালয়ত ২০১৯ চনৰ ১৩ ডিচেম্বৰত মুম্বাইত উত্তৰ প্ৰদেশ আৰক্ষীৰ বিশেষ গোটে গ্ৰেপ্তাৰ কৰিছিল চিকিৎসক কাফিলক৷ ৰাষ্ট্ৰীয় সুৰক্ষা আইনৰ অধীনত গ্ৰেপ্তাৰ কৰা কাফিল খানক পূৰ্বেও জামিন প্ৰদান কৰিছিল যদিও জেলৰ পৰা মুকলি নহওতেই ৰাষ্ট্ৰীয় সুৰক্ষা আইনৰ অধীনত গ্ৰেপ্তাৰ কৰা হৈছিল৷ আদালতে জিম্মা বৃদ্ধি নকৰিবলৈ কোৱাৰ লগতে এই কাৰ্যক বেআইনী বুলি কয়৷ উচ্চ ন্যায়ালয়ে কয় যে কাফিল খানক ৰাষ্ট্ৰীয় সুৰক্ষা আইনৰ অধীনত জিম্মাত লোৱা আৰু জিম্মাৰ ম্যাদ বৃদ্ধি বেআইনী৷ উচ্চ ন্যায়ালয়ে খানক সোনকালে মুকলি কৰি দিয়ক বুলি কয়৷ উল্লেখ্য যে, যোৱা ৬ মাহ ধৰি কাৰাগাৰত আৱদ্ধ হৈ আছে কাফিল খান৷ শেহতীয়াকৈ তিনিমাহৰ বাবে জিম্মাতৰ ম্যাদ কৰিছিল চৰকাৰে৷ কাৰাগাৰত থকাৰ সময়তে কাফিল খানে প্ৰধানমন্ত্ৰী নৰেন্দ্ৰ মোদীক এখন পত্ৰ লিখি ক’ৰোনা ৰোগীক চিকিৎসা কৰিব খুজিছিল৷