বোকাজানঃ উত্তৰ কাছাৰ পাৰ্বত্য স্বায়ত্ব শাসিত পৰিষদৰ মুখ্য কাৰ্যবাহী সদস্য দেৱলাল গাৰ্লোছাক কেন্দ্ৰ কৰি শেহতীয়াকৈ বিভিন্ন বিতৰ্ক অব্যাহত থকাৰ সময়তে আজি হাফলং আৰক্ষী থানাত এগৰাকী ঠিকাদাৰে মুখ্য কাৰ্যবাহী সদস্যগৰাকীৰ লগতে এগৰাকী পৰিষদীয় সদস্যৰ বিৰুদ্ধে মাৰ-ধৰ কৰাৰ অভিযোগ তুলি হাফলং থানাত এখন এহাজাৰ দাখিল কৰা ঘটনাই চাঞ্চল্যৰ সৃষ্টি কৰিছে।

পাঠানজিৎ জাৰামবুছা নামৰ জিলাখনৰ উমৰাংছ’ৰ ঠিকাদাৰগৰাকীয়ে আজি হাফলং থানাত দাখিল কৰা অভিযোগ অনুসৰি উত্তৰ কাছাৰ পাৰ্বত্য স্বায়ত্ব শাসিত পৰিষদৰ ৰতন জাৰামবুছাই যোৱা ২৫ আগষ্টৰ সন্ধিয়া পাঠানজিৎ জাৰামবুছাৰ ভগ্নী মণিতা লাংথাছাৰ ব্যক্তিগত নম্বৰত ফোনযোগে ঠিকাদাৰগৰাকীক অতি শীঘ্ৰে পৰিষদৰ মুখ্য কাৰ্যবাহী সদস্য দেৱলাল গাৰ্লোছাক তেওঁৰ অতিথিশালাত সাক্ষাৎ কৰাৰ বাবে জনায়। সেই অনুসৰি যোৱা ২৬ আগষ্টত ঠিকাদাৰগৰাকীয়ে লগত দেচো ডাউলাগুপু, সুদাম জইচি, নবীন হোজাই আৰু হামজন কেম্প্ৰাইক লৈ মুখ্য কাৰ্যবাহীগৰাকীক সাক্ষাৎ কৰে।

মুখ্য কাৰ্যবাহীগৰাকীয়ে তেতিয়া ঠিকাদাৰগৰাকীক তেওঁ বালি আৰু শিলৰ ভুৱা চালান ক’ৰ পৰা সংগ্ৰহ কৰিছিল বুলি প্ৰশ্ন কৰে যদিও ঠিকাদাৰগৰাকীয়ে এই চালান ভুৱা নহয় বুলি দাবী কৰাৰ লগতে হাফলং চহৰৰ এলাইট হোটেলৰ সমীপৰ এখন হাৰ্ডৱেৰ দোকানৰ পৰা চালান সংগ্ৰহ কৰা বুলি মন্তব্য কৰে। লগে লগে মুখ্য কাৰ্যবাহী গাৰ্লোছাই তেওঁৰ কেইজনমান লোকক মাৰপিট কৰাৰ নিৰ্দেশ দিয়ে। মুখ্য কাৰ্যবাহীৰ নিৰ্দেশ অনুসৰি কেইবাজনো লোকে ঠিকাদাৰগৰাকীক সমীপৰ বাথৰুমলৈ নি বেয়াকৈ মাৰ-ধৰ কৰা বুলি এজাহাৰত উল্লেখ কৰে।

ইয়াৰ পিছত ঠিকাদাৰগৰাকীক পুনৰ মুখ্য কাৰ্যবাহী দেৱলাল গাৰ্লোছাৰ সন্মুখলৈ অনাৰ পিছত গাৰ্লোছাই পুনৰ একে প্ৰশ্ন কৰাৰ পিছত ঠিকাদাৰগৰাকীয়ে পুনৰ হাৰ্ডৱেৰ দোকানৰ পৰা চালান সংগ্ৰহ কৰা বুলি উত্তৰ দিয়াৰ পিছতে হাৰ্ডৱেৰ ব্যৱসায়ীগৰাকীকো অতিথিশালালৈ মতাই আনি বেয়াকৈ মাৰ-ধৰ কৰে। কেৱল ইমানেই নহয় মুখ্য কাৰ্যবাহী গাৰ্লোছাই অহা দহ দিনৰ ভিতৰত ঠিকাদাৰগৰাকীৰ পৰা বিশ লাখ টকা দাবী কৰাৰ লগতে ধন আদায় নকৰিলে ব্যৱসায়ীগৰাকীক হত্যা কৰাৰো ভাবুকি প্ৰদান কৰা বুলি এজাহাৰখনত ব্যৱসায়ীগৰাকীয়ে অভিযোগ কৰে।

উক্ত সময়ত পৰিষদৰ সচিব অমিত ডাউলাগুপু, কাৰ্যবাহী সদস্য বিশ্বজিৎ ডাউলাগুপু, ডি এফ অ’ টুইন লাংথাছাও উপস্থিত থকা বুলি ঠিকাদাৰগৰাকীয়ে উল্লেখ কৰে। ঠিকাদাৰগৰাকীৰ ওপৰত চলোৱা এনে শাৰিৰীক নিৰ্যাতনৰ ঘটনাৰ বাবে ভুক্তভোগীগৰাকীয়ে আজি হাফলং থানাত উত্তৰ কাছাৰ পাৰ্বত্য স্বায়ত্ব শাসিত পৰিষদৰ মুখ্য কাৰ্যবাহী সদস্য দেৱলাল গাৰ্লোছা আৰু পৰিষদীয় সদস্য ৰতন জাৰামবুছাৰ বিৰুদ্ধে এজাহাৰখনত অভিযোগ কৰা হয়। আনহাতে, বিগত সময়ছোৱাত চিকিৎসাজনিত কাৰণত এজাহাৰ দাখিলৰ কৰাত বিলম্ব হোৱা বুলিও ঠিকাৰদাৰগৰাকীয়ে এজাহাৰত উল্লেখ কৰে।