ডিজিটেল ডেস্কঃই-বেংকিঙত আপোনাৰ জমা ধন জালিয়াতি হৈছে নেকি? ক’ভিড মহামাৰীৰ পিছত বিশ্বৰ অন্যান্য দেশৰ লগতে ভাৰততো ই-বেংকিঙৰ গুৰুত্ব বৃদ্ধি পালে। মানুহে বেংকলৈ যোৱাৰ পৰিৱৰ্তে হাতত থকা মোবাইল বা যিকোনো কম্পিউটাৰৰ যোগেদি ই বেংকিঙেৰে লেনদেন কৰা আৰম্ভ কৰিলে। কেন্দ্ৰীয় চৰকাৰৰ ডিজিটেল লেনদেনৰ ওপৰত গুৰুত্ব প্ৰদান কৰাত গ্ৰাহকে বেংকৰ পৰিৱৰ্তে ঘৰত থাকিয়েই বেংকৰ কাম-কাজ আৰম্ভ কৰিলে। আৰু ইয়াৰ সুবিধা গ্ৰহণ কৰিলে ছাইবাৰ অপৰাধী সকলে। ইণ্ডিয়ান কম্পিউটাৰ ইমাজেঞ্চি ৰেচপন টীমৰ প্ৰতিবেদন অনুসৰি ছাইবাৰ অপৰাধীয়ে ২০১৮ চনত ২.০৮ লাখ টকা ক্ষতি কৰাৰ বিপৰীতে ২০২১ চনত ১৪.০২ লাখ টকা জালিয়াতি কৰিছিল। ডেবিড কাৰ্ড, ক্ৰেডিট কাৰ্ড আৰু ইণ্টাৰনেট বেংকিঙৰ যোগেদি ২০২০-২১ বৰ্ষত দেশত প্ৰায় ৬৪ কোটি টকা অপৰাধী চক্ৰই লোট কৰিছে। শেহতীয়াকৈ এচবিআইয়ে এক বীমা যোজনাৰ জৰিয়তে গ্ৰাহকৰ ছাইবাৰ অপৰাধীয়ে কৰা ক্ষতিপূৰণ দিবলৈ ব্যৱস্থা কৰিছে। এচবিআই জেনেৰেল ছাইবাৰ ভল্টেজ নামৰ এই প্ৰকল্পটোৰ জৰিয়তে ডিজিটেল মাধ্যমেৰে লেনদেন কৰোতে আপুনি যদি ঠক-প্ৰবঞ্চকৰ হাতত লোকচানৰ সন্মূখীন হয় তেতিয়া হলে ক্ষতিপূৰণ লাভ কৰিব।