নুমলীগড়ঃ পূৰ্বপুৰুষৰ ইতিহাস বিজড়িত ঐতাহাসিক গড়ত বুলডজাৰ চলোৱাত জাঙুৰ খাই উঠিছে উজনিৰ দল-সংগঠন৷ অইলে অবৈধ ভাৱে এটা ৰজাদিনীয়া গড় খান্দি পাইপ বহুওৱাত চৰকাৰ তথা অইলৰ বিৰুদ্ধে উজনিৰ গোলাঘাট জিলাত ব্যাপক প্ৰতিক্ৰিয়াৰ সৃষ্টি হৈছে৷ কেইবাটাও সংগঠনৰ নেতৃত্বই উক্ত গড় পৰিদৰ্শ কৰি অইলৰ এনে সিদ্ধান্তক গৰিহণা দি খনন বন্ধ কৰিবলৈ দাবী জনাই আহিছে যদিও অইলে এনে দাবীক ভ্ৰুক্ষেপ কৰা নাই৷ ফলত দল-সংগঠনে খননক লৈ নুমলীগড়ত প্ৰতিবাদ অব্যাহত ৰাখিছে।

ঐতিহাসিক নুমলীগড়ত নুমলী কুৱঁৰী গড় জেচিবিৰে খান্দি পাইপ বহুওৱাত এইবাৰ প্ৰতিবাদত নামিছে ঐক্য সেনা অসম নামৰ সংগঠনটোৱে৷ সংগঠনটোৱে সোমবাৰে গড়ত উপস্থিত হৈ ক্ষোভ ব্যক্ত কৰে৷ প্ৰতিবাদ কৰাৰ লগতে জেওৰা দিবলৈ সংগঠনটোৱে বাঁহৰ খুঁটি কাটি নিয়ে৷ গড় কাটি উলিওৱা অস্থায়ী ৰাস্তাত বাঁহৰ খুঁটিৰে জেওৰা দিয়ে সংগঠনটোৱে৷ পথেৰে অইলৰ বিষয়া-কৰ্মচাৰী আৰু গাড়ী চলাচল কৰে৷ অস্থায়ী পথত বেৰা দি অইলৰ এনে অসম বিদ্বেষী কাৰ্য বন্ধ কৰিবলৈ আৰু গড় খন্দা কাৰ্য বন্ধ কৰিবলৈ দাবী জনায়৷ ঐতিহাসিক নুমলীগড়ত ঐক্যসেনা অসমে জেওৰা দি দাবী মানি নললৈ ব্যাপক প্ৰতিবাদৰ সন্মুখীন হ’ব লাগিব বুলি সকিয়াই দিয়ে অইলক।