গুৱাহাটীঃ বিশিষ্ট দৌৰবিদ অৰ্জুন বঁটা প্ৰাপ্ত প্ৰথম অসমীয়া ভোগেশ্বৰ বৰুৱাৰ আজি ৮০ সংখ্যাক ওপজা দিন৷ ১৯৬৬ চনৰ এছিয়ান গেমছৰ এথলীটত সোণৰ পদক আজুৰি আনি দেশ তথা অসমলৈ গৌৰৱ কঢ়িয়াই আনিছিল অৰ্জুন ভোগেশ্বৰ বৰুৱাই।

অৰ্জুন ভোগেশ্বৰ বৰুৱাৰ জন্মদিনটো সমগ্ৰ অসমে অভিৰুচি ক্ৰীড়া দিৱস হিচাপে পালন কৰা আহিছে। অভিৰুচি ক্ৰীড়া দিৱস‌ৰ জৰিয়তে অসমৰ উঠি অহা প্ৰজন্মক ক্ৰীড়া ক্ষেত্ৰখনৰ বাবে অনুপ্ৰেৰণাৰ উৎস হৈ থাকিবলৈ কামনা কৰা হয়৷ আন্তঃৰাষ্ট্ৰীয় ক্ৰীড়া প্ৰতিযোগিতাত পদক লাভ কৰিবলৈ সক্ষম হোৱা অন্যতম অসমীয়া খেলুৱৈ ভোগেশ্বৰ বৰুৱা।

অৰ্জুন বঁটা বিজয়ী প্ৰথম অসমীয়া বৰুৱাৰ জন্ম হৈছিল ১৯৪০ চনৰ ৩ ছেপ্তেম্বৰত শিৱসাগৰত। ১৯৬৬ চনত বেংককত অনুষ্ঠিত এছিয়ান গেমছত ৮০০ মিটাৰ দৌৰত সোণৰ পদক অৰ্জন কৰি প্ৰতিযোগিতাত অভিলেখ সৃষ্টি কৰিছিল৷ এছিয়ান গেমছত সোণৰ পদক অৰ্জন কৰা প্ৰথমজন অসমীয়া বৰুৱাক ১৯৬৬ চনত অৰ্জুন বঁটাৰে সন্মানিত কৰা হৈছিল।

অসম চৰকাৰে প্ৰতি বছৰে ৩ ছেপ্তেম্বৰত বৰুৱাৰ জন্মদিনটোত অভিৰুচি ক্ৰীড়া দিৱস হিচাপে বৰ্ণাঢ্য কাৰ্যসূচীৰে পালন কৰি আহিছে। এইগৰাকী অসমীয়া অৰ্জুন বঁটা প্ৰাপ্ত প্ৰথম অসমীয়া খেলুৱৈ ভোগেশ্বৰ বৰুৱাক ৮০তম জন্মদিনৰ বহু লোকে শুভেচ্ছা যাচিছে৷