নিউয়ৰ্কঃ ভেকচিন নোলালে অহা বছৰ ফেব্ৰুৱাৰী পৰ্যন্ত দেশত দৈনিক ২ লাখ ৮৪ হাজাৰ লোক কৰ’না ভাইৰাছত আক্ৰান্ত হ’ব পাৰে। কৰ’নাক লৈ ভাৰতৰ বাবে এই উদ্বেগজনক মন্তব্য কৰিছে মাছাচুটছ ইনষ্টিটিউট অব টেকন’লজি চমুকৈ এমআইটিৰ গৱেষকসকলে।

বিখ্যাত এই প্ৰতিষ্ঠানটোৰ সমীক্ষাত কোৱা হৈছে যে বৰ্তমানৰ পৰিস্থিতি অব্যাহত থাকিলে আমেৰিকা, ব্ৰাজিলক পিছ পেলাই বিশ্বৰ কৰ’না বিধ্বস্ত দেশসমূহৰ শীৰ্ষ স্থানত উপনীত হ’ব ভাৰত। ইয়াৰ কাৰণ হিচাপে প্ৰতিষ্ঠানটোৱে ভাৰতৰ কৰ’না মেনেজমেণ্টত হোৱা ক্ৰুটি-বিচ্যুতিৰ দিশটোলৈ আঙুলিয়াই দিছে।

উল্লেখ্য যে মাছাচুটছ ইনষ্টিটিউটৰ তৰফৰ পৰা ৮৪ খন দেশৰ প্ৰায় ৬০ শতাংশ নাগৰিকৰ ওপৰত অনলাইনযোগে সমীক্ষা চলোৱা হৈছিল। সমীক্ষাৰ অন্তত প্ৰতিষ্ঠানটোৰ গৱেষকসকলে কৈছে যে ২০২১ৰ মাৰ্চ মাহৰ পৰা মে’ মাহলৈ সমগ্ৰ বিশ্বত কৰ’না আক্ৰান্তৰ সংখ্যা ২০ৰ পৰা ৬০ কোটি হৈ পৰিব।

এই সকলোবোৰ ৩টা বিষয়ৰ ওপৰত নিৰ্ভৰ কৰিব বুলিও কোৱা হৈছে সমীক্ষাটোত। এই বিষয় ৩টাৰ প্ৰথমটো হৈছে যদিহে বৰ্তমানৰ হাৰত টেষ্টিং অব্যাহত থাকে, দ্বিতীয়তে পৰীক্ষাৰ হাৰ বাঢ়িলে আৰু তৃতীয়টো হৈছে পৰীক্ষাৰ হাৰ একে থাকিলেও সংক্ৰমণৰ হাৰ বৃদ্ধি পালে।

সমীক্ষকসকলৰ মতে সংক্ৰমণৰ হাৰ বৃদ্ধি পোৱাটোৱেই হৈছে এই তিনিটা কাৰণৰ ভিতৰত আটাইতকৈ উদ্বেগজনক। সমীক্ষাত দেখা পোৱা গৈছে যে চলিত বৰ্ষৰ শেষৰ ফালে অৰ্থাৎ ছেপ্টেম্বৰ-নৱেম্বৰ মাহত সংক্ৰমিতৰ সংখ্যা একে কোবে বহুত বাঢ়ি যাব পাৰে। এই ক্ষেত্ৰত সংক্ৰমণ ৰোধৰ ক্ষেত্ৰত হাতত লোৱা ব্যৱস্থাসমূহলৈ চাই ভাৰতেই আটাইতকৈ ক্ষতিগ্ৰস্ত হ’ব বুলি স্পষ্ট কৰি দিছে প্ৰতিষ্ঠানটোৰ গৱেষকসকলে।

ভাৰতৰ পিছতে বাংলাদেশ, পাকিস্তান আৰু বৰ্তমানৰ পৰিস্থিতিৰ কোনো সালসলনি নকৰিলে আমেৰিকা যুক্তৰাষ্ট্ৰতো সংক্ৰমণৰ হাৰ হোৰাহোৰে বৃদ্ধি পাব পাৰে বুলিও সমীক্ষাৰ ফলাফলত স্পষ্টকৈ কোৱা হৈছে। সমীক্ষকসকলৰ মতে আৰম্ভণি পৰ্যায়ত এই দেশসমূহৰ চৰকাৰে বিষয়টো গুৰুত্বসহকাৰে নোলোৱা বাবেই এনে হোৱাৰ সম্ভাৱনা ক্ৰমাৎ বৃদ্ধি পাইছে।