বোকাজানঃ পাহাৰীয়া জিলা কাৰ্বি আংলংৰ বোকাজান মহকুমাৰ অন্তৰ্গত ডিলাই আৰক্ষীয়ে সোমবাৰে পুৱা এক অভিযান চলাই বুজন পৰিমাণৰ ড্ৰাগছ উদ্ধাৰ কৰিবলৈ সক্ষম হয়। এক গোপন খবৰৰ ভিত্তিত ডিলাই আৰক্ষী থানাৰ অন্তৰ্গত অসম-নগালেণ্ড সীমান্তৱৰ্তী ডিলাই-লাহৰীজান তহলদাৰী চকীৰ ভাৰপ্ৰাপ্ত বিষয়া মনেজ্জ্বল গগৈৰ নেতৃত্বত আৰক্ষীৰ এটা দলে ডিলাই-লাহৰীজানত তাৎক্ষণিকভাৱে বহুওৱা নাকাত ডিমাপুৰৰ পৰা আহি থকা এএছ-২৫-ডিচি-৬৮১৬ নম্বৰৰ টাটা কোম্পানীৰ ডি আই গাড়ীখনৰ স্পেয়াৰ টায়াৰ ভিতৰত ৩৩ টা চাবোনৰ বাকচত ভৰাই অনা অৱস্থাত ড্ৰাগছখিনি উদ্ধাৰ কৰিবলৈ সক্ষম হয়।

বাহনখনৰ পৰা আৰক্ষীয়ে মুঠ ৫৭২ গ্ৰাম হেৰ’ইন জব্দ কৰিবলৈ সক্ষম হয়। ড্ৰাগছ খিনিৰ সৈতে আৰক্ষীয়ে গোলাঘাট জিলাৰ চুঙাজান থানাৰ অন্তৰ্গত পঞ্চমুখী টেঙাতলৰ চাদ্দাম হুছেইন (২৫) আৰু নগাঁও জিলাৰ জুৰীয়া থানাৰ অন্তৰ্গত লালুং গাঁৱৰ কাছেম আলি (২৯) নামৰ দুজন যুৱকক আটক কৰিবলৈ সক্ষম হয়। উল্লেখ্য যে, বোকাজান মহকুমা আৰক্ষী বিষয়া জন দাস আৰু ডিলাই থানাৰ ভাৰপ্ৰাপ্ত আৰক্ষী বিষয়া ৰাজু বাহাদুৰ ছেত্ৰীৰ তত্বাৱধানত এই অভিযান চলোৱাৰ লগতে জব্দকৃত ড্ৰাগছখিনিৰ আন্তঃৰাষ্ট্ৰীয় বজাৰত আনুমানিক মূল্য ত্ৰিশ লক্ষাধিক টকাৰ বুলি আৰক্ষী সূত্ৰে প্ৰকাশ।