গুৱাহাটীঃ ৰাজ্যত দ্ৰুত গতিত বৃদ্ধি হৈছে ক’ৰোনা আক্ৰান্ত ৰোগীৰ সংখ্যা৷ লক-ডাউন শিথিল কৰাৰ পিছৰে পৰা বহিঃৰাজ্যৰ লোক অসমত প্ৰৱেশ কৰাৰ পিছৰে পৰা ক’ৰোনা আক্ৰান্ত ৰোগী প্ৰতিদিনে বৃদ্ধি হৈছে৷ চলিত সপ্তাহত ক’ৰোনা আক্ৰান্ত ৰোগী ধৰা পৰাৰ হাৰ বেছি বুলি চৰ্চা হৈছে৷

তাৰ মাজতে দেওবাৰে ৰাজ্যৰ কেইবাখনো জিলাত পুনৰ ৪৩গৰাকী লোকৰ দেহত ধৰা পৰিছে ক’ৰোনা পজিটিভ৷ দেওবাৰে দিন ১২ বাজি ৩০ মিনিটত ৰাজ্যৰ স্বাস্থ্যমন্ত্ৰী ড০ হিমন্ত বিশ্ব শৰ্মাই এটা টুইট কৰি এই কথা ৰাজহুৱা কৰিছে৷

দেওবাৰে দিনৰ ১২ বজা পৰ্যন্ত অসমৰ মুঠ ৰোগীৰ সংখ্যা হৈছে ৩৯৪৩গৰাকী৷ মন্ত্ৰী হিমন্তই জনোৱা মতে, নতুনকৈ ধৰা পৰা ৰোগীসকল ৰাজ্যৰ কেইবা খনো জিলাৰ৷ ১৪ গৰাকী নগাঁৱৰ, ১০ গৰাকী গোলাঘাটৰ, ১০ গৰাকী কামৰূপৰ, ২ গৰাকী যোৰহাটৰ, ২ গৰাকী বাক্সাৰ, ২ গৰাকী চিৰাঙৰ, এগৰাকীকৈ কাৰ্বি আংলং, ধেমাজি আৰু বঙাইগাঁৱৰ।

আনহাতে অসমত বৰ্তমানলৈ কোৱিড-১৯ত আক্ৰান্ত ২১২৭ৰাকী ৰোগী চিকিৎসাধীন হৈ আছে৷ ১৮০৫গৰাকী ৰোগী সুস্থ হৈ চিকিৎসালয় এৰিছে৷ ক’ৰোনাত আক্ৰান্ত ৮গৰাকী লোকৰ মৃত্যু হৈছে৷