ডিজিটেল ডেস্কঃ বলিউদৰ বিগ বি অমিতাভ বচ্চন আৰু পুত্ৰ অভিষেক বচ্চনৰ ক’ৰোনা পজিটিভ ধৰা পৰিছে৷ এই কথা পিতা-পুত্ৰই খোদ টুইট কৰি শনিবাৰে নিশা ৰাজহুৱা কৰিছে৷ অমিতাভ বচ্চনে টুইট কৰি কয় ‘‘পৰীক্ষা কৰাত মোৰ ক’ৰোনা পজিটিভ ধৰা পৰিছে৷ হস্পিতালত ভৰ্তি হৈছো৷ হস্পিতাল কৰ্তৃপক্ষক খবৰ দিয়া হৈছে৷ পৰিয়াল আৰু কৰ্মচাৰীৰ পৰীক্ষা কৰা হৈছে৷ তেওঁলোকৰ পৰীক্ষাৰ ফলাফল অহা নাই৷’’ ৭৭ বছৰীয়া অমিতাভ মুম্বাইৰ নানাৱটী হস্পিতালত ভৰ্তি হৈছে৷

জানিব পৰা মতে, অমিতাভ বচ্চনক এটা পৃথক ৱাৰ্ডত ৰখা হৈছে আৰু চিকিৎসকে প্ৰতিটো মুহূৰ্তত চোৱাচিতা কৰিছে৷ আনহাতে তেওঁৰ সম্পৰ্কত অহা প্ৰতিগৰাকী লোকক পৰীক্ষা কৰিবলৈ অনুৰোধ জনায় অমিতাভ বচ্চনে৷

আনহাতে পুত্ৰ অভিষেক বচ্চনে টুইট কৰি কয় ‘‘আজি মোৰ আৰু মোৰ পিতৃ ক’ৰোনাত সংক্ৰমিত হোৱা বুলি থিৰাং হৈছে৷ আমাৰ সাধাৰণ উপসৰ্গ দেখা পোৱাত হস্পিতালত ভৰ্তি কৰোৱা হৈছে৷ আমি সকলো জৰুৰী কৰ্তৃপক্ষক অৱগত কৰিছো আৰু আমাৰ পৰিয়াল আৰু সকলো কৰ্মচাৰীক পৰীক্ষা কৰোৱা হৈছে৷’’ ইপিনে মহানায়ক অমিতাভ বচ্চন আৰু পুত্ৰ অভিষেক ক’ৰোনাত আক্ৰান্ত হোৱাৰ খবৰ প্ৰচাৰ হোৱাৰ পিছতে এই খবৰ ছ’চিয়েল মিডিয়াত ট্ৰেণ্ড হ’ব ধৰে৷ ছ’চিয়েল মিডিয়াত হাজাৰ হজাৰ গুণমুগ্ধই পিতা-পুত্ৰৰ আশু আৰোগ্য কামনা কৰে৷