নুমলীগড়ঃ আগন্তুক ২০২১ বিধানসভা নিৰ্বাচনৰ বাবে উজনি-নামনি আৰু বৰাক উপত্যকাত সষ্টম হৈ পৰিছে শাসকীয় বিজেপি দল। শাসকীয় বিজেপি দলে ৰাজ্যৰ প্ৰতিটো সমষ্টিত ৰনডংকা বজাই থকাৰ সময়তে সৰুপথাৰ সমষ্টিত উঠি-পৰি লাগিছে বিজেপি৷ সৰুপথাৰ সমষ্টিৰ মৰঙী মৌজাৰ ২নং পোৰাজংঘলত মৰঙী মণ্ডল বিজেপিৰ উদ্যোগত মৰঙী মণ্ডলৰ সভাপতি সুৰেন্দ নাথ গগৈৰ সভাপতিত্বত এখন সাংগঠনিক সভা অনুষ্ঠিত হয় শনিবাৰে। সভাত বিভিন্ন ৰাজনৈতিক দলৰ শতাধিক নেতা-কৰ্মীয়ে বিজেপিত যোগদান কৰে৷

সভাত গোলাঘাট জিলা বিজেপিৰ উপ-সভাপতি বিশ্বজিত ফুকন উপস্থিত থাকি কংগ্ৰেছৰ দুৰ্নীতি, ভ্ৰষ্টচাৰ, অপ-শাসনৰ পৰিৱৰ্তে বিজেপিৰ উন্নয়ন আৰু বিকাশ বিচাৰি দৈনিক সৰুপথাৰৰ ভিন্ন প্ৰান্তত শ শ লোকে বিজেপিত যোগদান কৰিছে বুলি দাবী কৰে। ফুকনে সৰুপথাৰত বিজেপি দলত যোগদানৰ জোৱাৰ উঠিছে বুলি কৈ বিগত পোন্ধৰ বছৰে কংগ্ৰেছৰ দখলত থকা সৰুপথাৰ সমষ্টিৰ মৰঙী মৌজাবাসী বঞ্চিত হৈ থাকিল বুলি কয়৷ যাৰ বাবে কংগ্ৰেছৰ প্ৰতি ৰাইজৰ বিশ্বাস ভংগ হোৱা বুলি কয় ফুকনে।

গোলাঘাট জিলা বিজেপিৰ উপ-সভাপতি বিশ্বজিত ফুকনে আৰু কয় যে এতিয়া দৈনিক শ শ লোকে বিজেপি দলত যোগদান কৰিছে। যেন পৰিবৰ্তন বিচাৰিছে সৰুপথাৰবাসীয়ে। বিজেপি নেতা বিশ্বজিৎ ফুকনে সৰুপথাৰৰ বৰ্তমানৰ বিধায়িকা ৰ’জলীনা তিৰ্কীক ‘অকৰ্মণ্য বিধায়িকা’ খ্যাতি লাভ কৰা বুলি কৈ বিধায়িকাগৰাকী অকৰ্মণ্য বাবেই সৰুপথাৰৰ সমষ্টিবাসীৰ উন্নয়ন হোৱা নাই বুলি অভিযোগ উত্থাপন কৰে। গোলাঘাট জিলা বিজেপিৰ উপ-সভাপতি বিশ্বজিত ফুকনৰ নেতৃত্বত কংগ্ৰেছৰ লগতে বিভিন্ন দল-সংগঠনৰ নেতা-কৰ্মী ভাৰতীয় জনতা পাৰ্টিত যোগদান কৰি অহা পৰিলক্ষিত হৈছে।