নুমলীগড়ঃ তিনিচুকীয়া জিলাৰ বাঘজানত তৈল খাদত বিস্ফোৰণ সংঘটিত হৈ দুজনকৈ লোকৰ প্ৰাণ হেৰুওৱাৰ লগতে কেইবা শ পৰিয়ালৰ ঘৰ-বাৰী জুইত জাহ যায়৷ কেইবা হাজাৰ লোক শৰণাৰ্থী শিবিৰত থাকিব লগা হৈছে৷ সমগ্ৰ ৰাজ্যত বাঘজান কাণ্ডৰ বিৰুদ্ধে তীব্ৰ প্ৰতিক্ৰিয়া অব্যাহত থকাৰ সময়তে এইবাৰ চকু পৰিছে নুমলীগড়ত৷ অইলৰ বুলডজাৰ ঐতিহাসিক নুমলীগড়ত পৰা পৰিলক্ষিত হৈছে৷

অইল ইণ্ডিয়াই কছাৰী ৰাজত্বৰ শেষ অস্তিত্ব নুমলীগড় খান্দি অইলৰ পাইপ বহুওৱাত সোচ্ছাৰ হৈ পৰিছে দল-সংগঠন। স্থানীয় প্ৰশাসনৰ অগোচৰেই অইল ইণ্ডিয়াই নিজ খেয়ালখুচী মতে ঐতিহাসিক নুমলীগড়ৰ গড় কটা কাৰ্য ব্যাপক প্ৰতিক্ৰিয়াৰ সৃষ্টি কৰিছে নুমলীগড়ত।

সদৌ অসম ছাত্ৰ সন্থা, অসম চাহ জনজাতি ছাত্ৰ সন্থাকে ধৰি কেইবাটাও সংগঠন জাঙুৰ খাই উঠিছে অইলৰ এনে কাণ্ডৰ বিৰুদ্ধে৷ ঐতিহাসিক সম্পদ সংৰক্ষণ কৰাৰ বিপৰীতে অসমৰ মানচিত্ৰৰ পৰা চিৰদিনৰ বাবে হেৰাই যাবলৈ ওলোৱা গড়টো এতিয়া সোমাই পৰিল অইলৰ হাতোৰাত। এতিয়া প্ৰশ্ন হয় ৰাজ্যৰ বিয়াগোম পূৰাতাত্বিক বিভাগ এটা থকাৰ পাছটো কেনেদৰে অইল ইণ্ডিয়া লিমিটেডে বুলডজাৰ চলালে ঐতিহাসিক নুমলীগড়ত৷